Traffic Jam vanga Kan mangan a bo dawn ta!

– Lalhruaitluanga Bawitlung

Kumin December 1 chu ka va nghakhlel tak em! Krismas leh Kum Thar pawh a nuam tawh ngawt ang. Engati nge? E le, Aizawl Traffic Jam nasa lutuk hi sorkarin a chingfel vek dawn a, nikum October 1, 2016 atanga ni 426, kum khat leh thla hnih zet kha lirthei chitin, two-wheeler leh Road roller ang chi zawng zawng tiamin Garage (a dahna – mipui kawng tana hnawk lova dahna) nei vek turin hun tam tawk a pe a. Sorkar Motor, Car, Earth Mover etc., zawng zawng pawh a huam vek a ni. Lirthei neituten anmahni inah emaw an thenawmte inah emaw a remchang lai apiangah Garage an sa tih han hmuh hian sorkar thu hi an awih hle dawn tih a lang reng mai a, a va lawmawm tak em!

Aizawl lirthei tam lutuk vanga harsatna kan tawh zingah Mizoram Pollution Control Board (MPCB) ngaihdana lirthei khu chhuak (pollution) boruak tichhetu hi a lo sang ve ta viau a lo ni. Hei hi mihring hriselna tichhe theitu, chuap leh taksa Organ dang tichhia a, harsatna tam tak min thlentu a ni, an ti.

Traffic Jam ber a awm tawh loh chuan Bawngkawn atanga Kulikawn chu minute 20 vel lekah kan thleng thei dawn a ni. A va nuam dawn em! Petrol a hek lo dawn bawk si, hmanhmawh thilah kan vak kual zung zung thei dawn a ni.

Aizawlah hian lirthei neitu aiin mi satliah, lirthei nei ve lo hi kan tam daih zawk a. Lirthei hrim hrim khalhtute pawh an hawihhawm viau tawh ang tih ka beisei. Kawnglai tak maia han din tlat mai te, hnunga kalte ngaihtuah miah lova rei zet mi biaa han dinte pawh kan sim tial tial ka beisei.

Keini ang lirthei nei ve lo tan chuan duh hun hunah, khawi hmun atang pawha taxi koh theih tura UD&PA leh Ola Company-in Aggregator role nei tura an hmalakna hi a hlawhtling hman turah ngai ila. Car neite pawh hian ‘Parking’-ah harsatna an neih fo avangin Officer, mahni driver nei pha chin lo tan phei chuan Aizawl-ah hian car hawl chhuah ngam pawh a ni ta chuang lo bawk nen! Hetianga zanlaiah pawh, zing vartianah pawh koh mai theih Taxi Service kan neih theih chuan keini tuna Car nei ve lo tan chuan Car nei ang tho kan ni. Car nei ang tho kan nih chuan tuna Car man ka lo tuak ve pawh hi kawng dang tangkaiah ka hmang daih dawn!

Sorkarin thil tha a tih dawnin dodalna a awm fo mai a. He Traffic Jam Free Aizawl Policy tha lutuk pawh hi lirthei nei tlem te emaw Political Party, tuna sorkarin an thiltih that avanga mipuiin kum 2018-ah an cote sorkar leh hlau tlatte chuan an dodal leh mai thei. Hetah hian hei hi i chiang ang u khai. Lirthei nei aiin nei ve lo hi kan tam zawk daih. Hausak vangin Democracy-ah duh ang angin mi retheite a thunun ngawt theih loh. Kawngpui hmangtu, mipuite hi i tangrual ve ila, dodalna awm apiang chu eng kawng pawha sorkarin hma a lak chuan i thlawp tlat ang u. He mipuite kan sal tanna, Aizawl Traffic Jam hi tu tan pawh a hnawksak a, ui tur pakhat tê mah a awm lo. Aizawl mipuite u, huai takin sorkar i tawiawm ang u. Traffic Jam awm lohna khawpui din turin a mi chhe ber pawh kan tangkai dawn e. Tunah ni 90 zen zawn Garage siam nan a la nei loten hun an la nei bawk a.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?