Triau Trackx band boruak ri ret ret

Ri ret ret a awm a, anmahni zawh pawhin an sawi duh lo a. An nui ‘quit’ deuh thak zel. Tun tum chu an zia a dang a, engmah an sawi lawk duh lo. Mahse, Triau Trackx hian tunkar tharah thil thar an nei dawn tih thuthang ri ret ret a awm tlat.

Tunhnaiah thil thar an nei lem lo a. An thawm pawh a reh viau. An music video hnuhnung ber kha, kumin August thla tir khan an tichhuak a. Chu chu ’24×7 (Ka Damdawi)’ tih a ni a. He music video phei chu hriat theih chinah Mizo music video zinga million 1 viewer nei tling hmasa ber record a siam phah nghe nghe.
’24×7 (Ka Damdawi) an tihchhuah hmaa a hnuhnung ber chu, nikum December ni 9 khan YouTube-ah an music video an dah chhuak. Hei erawh hi chu music video pangngai ang nilo, lyrical video ang chi a an siam a ni chauh a. Chu chu ‘Zan Tawnmang’ tih kha a ni.

‘Zan Tawnmang’ track hi Triau Trackx original a ni lo a. He hla hi, khatih laia kum 16 leka upa, hmeichhe tleirawl Note-i phuah a ni a. Chutih laiin, Champhai band hian midang hla sak tum loa rilru an lo siam nghet tawh tak mai thiat tu hla a nih avangin hla tha tak, fak chawp ngai lo a ni tih chu a chiang mai awm e.

Kumin August thlaa an hla hnuhnung ber an tihchhuah hnuah, Triau Track hian thawm an rawn neih leh hmasak ber chu hei hi a ni. Mahse, engmah an sawi chiang thei lo a. An rimawi ngainatute leh Zo rimawi khawvel hi an rawn barakhaih dawn niin a lang a. Chutih rual erawh chuan, eng ang thawm nge an neih dawn tih pawh hriat chian a la ni thei lo. Music video an tichhuak dawn nge, album an release dawn — tunkar tharah hian a hriat mai turah ngai ang.

Tum dangah chuan Triau Trackx band hian an official single music video an tihchhuah dawnin, social media lamah an tlan khalh thin a. Release a nih hma hauh atangin boruak an chawk alh hluai a. Ngaihthlak leh hmuh tichakawm tawk turin an rawn inphochhuak thiam riau thin. Amaherawh chu, tun tumah chuan an boruak neih dan a dang ta tlat mai. Hriatchian a chakawm a, beng an ti vir mange!

Facebooktwittergoogle_plusredditpinterestlinkedinmail

Comments

Leave a Reply

This site uses Akismet to reduce spam. Learn how your comment data is processed.

Login

Lost your password?