Tribal Super Star LSZ-a kan hloh; K’u Muanga Quo Vadis?

Mizo i nih chuan Eles Comics, Sudden Muanga leh Laisaizawk’s – pathum zinga 1 tal chu i hria ang; hre lo an awm a nih pawhin intih changkanna thing chi ‘hre lo der’ an ni tho tho ang. Sudden Muanga ziaktu J. Lalsangzuala a boral a\ang khan Sudden Muanga hluttu an tam zia a hriat a. In Pui lamah lawi lovin Lamka ni mahse kan tuar hlawm chu a nih kha. Lungleng mite’n a thlahna thu social media-ah an vawm darh chum chum a; print media ah pawh hmun a luah lian teh e. Linguist ril tak leh intellect a ni tih chu Sudden Muanga siamchhuaktu hian A sulhnu te chu thuhretuah a hmang thei ang a, Zofate’n an pawmpui bawk ang. ‘Character’ atana hming a vuah hrim hrim hian language hlutna a phawk der tawh a, ‘contrast and compare’ antih thin (inletling phuah pawlh) ‘Sudden’ ni si a ‘Muang’ lawi si lai chauh pawh khel ve fe tham a awm. Laisaizawka sulhnu hian hlutna (literary value) a nei sang tial tial dawn a; a tei rei peihna chu thuhran nise ‘satirical comic’ (nuihza/ elhsenna) awmze nei bu pakhat chauh ni lo 95 lai a khawrpum hman a, thangkhat lian  tihchhuah a ni.

Peng thut teh ang. 50 BC-100 AD inkar kha Europe Thlang lam ram te tan hun chhinchhiah tlak a ni a, ‘barbarians’ leh Rom Sawrkar an indo bur bur a,  Rom Sawrkar insawhngheh leh ‘tunlai’ zawka ngaihtuahna mihringin a hman tan chhoh hunlai a ni a, Rom sawrkar kha Civilized (tunlai mi/hmasawn mi) khawvel intannaah pawm a ni hial a. Hemi history leh a kaihhnawih dangte hrul hian mi 2- Rene Goscinny (thu ziaktu) leh Albert Uderzo (lemziaktu) te chuan 1961 khan Gaul tlangval, pumrua lian lo tak  ‘The Adventures of Asterix’ chanchin chu comic ah an tichhuak a, a kawppui atan dul kiar zet mai ‘Obelix’ an chhawpchhuak tel bawk a. Rom Sawrkar chu hnawlin khawte reuh te ah  Gauls pasatha te chu an khaw Lal Vitalstatistix hovin an inkulh a; ramhmul daktawr Getafix-a chuan ‘chakna thahrui pe thei’ a siam chhuak thiam a, Gaul pasaltha te’n an han lem sek a, ‘khawvel piah lam’ atanga tha hrui chak pek ang maiin Rom sipai te chu an sawp hrep thei a ni. Gauls ho hi an awm tak taka comic-a an landan erawh an ni vek lo. Tuna France ram hmun thenkhat chu an luah thin a ni. History leh phuahchawp inpawlh ‘satirical comic’ a ni a, a hunlaia mi challang Juluis Ceaser, Brutus, Octavius leh midangte pawh ‘character’-a siamin fiamthu thawh nan Uderzo te thian dun chuan an channawi ta thin a. Asterix a bu hi series 36 a awma, tawng 100 laia lehlin niin copy Nuai 3500 hralh a ni tawh. Lamka-ah inkhuar ta sela Goscinny te pahnih (2) hian engchen nge an thlen ang le?

Sudden Muanga leh Asterix-a bu hian in anna tam tak a nei a, thil thleng tawh te, suangtuahna ram a tak anga sawngbawlna a ni ber a, mahse awmze nei tak si an ni. Fiamthu bu angin pawnlawi ah lang mahse ‘a hun laia thil thleng’ lan tirna a ni a. Hemi tehfungah phei chuan Laisaizawk’s hi a filawr zawk mahna. Gaul pasaltha te chanchin-ah hian thil thleng tak tak ni lemlo, hmehbel theih si a tam a, Sudden Muanga erawh ram darthlalang ni pha hial a ni. Mizoram-in a hun tawn ang apiang chu fiamthu elhsen rawngkai comic ah LSZ-a chuan a vawm khawm ta thin a; inven nan a kawm (cover) ah pawh ….. ‘chaw tak khuk pui chi a ni leu’ tiin tarlan a nih thin kha. Writer te zingah caricature (lemziak thiam) ni kawp an tam lo khawp ang, Mafaa hi lemziahah chuan a ‘nil’ ve khawp ang. Uderzo a te angin comical takin ziak lo mahse Saizawks-a chungnunna chu 1977 a Sudden Muanga bu hmasa ber a tihchhuah atangin a hmuh theih a, a thu leh a lem a into delh nghal a. Stencil ah a lem a ziaka, Remington Steele type writer hmangin voice box ah a thu a la khung thlap thei zui; delete ve theih hek loh correction fluid litre engzah tak a hun chhung khan hmang ral ang maw? Cyclostyle-a her a ni a, stencil cut a thler dawn chiang; ziah nawn; chhut nawn a tam a taima ve tak chu a ni hrim hrim, chilh khawm ringawt pawh hna hautak a ni a, hetiang comic ziak midang khawvel hian a kawl emaw chu?

Sap ziakmi Oliver Strange an cowboy thawnthu a ziah, Mizoa lehlin tak Sudden-(a) rim nam chu a ni ngei a, a ziaktu hian a tirah chuan fiamthu comic angin kal tir a tuma, mahse Zoram khawvel – Eiru te ram leh Sawrkar tana hnawk;, Kohhran anga inepna lian tak awm sawichhuah ngam chi loh te; khawtlang rilru puthmang diklo kawk chhuaka an insiam that theihna turin in enletna dawhsan atan Mizo Superman Ku Muanga chu a pian tir ta a ni. Selna na tak tak tarlan a nih dawn avangin a character chu mipuiin an huat loh a ngai a, hmelchhe zet mai, tawng thei mahse nuihtiza bawk si nungchang te character 1 ah a dah khawm a ni ber a, uchuak khawpin tawngkam na tak sawi mahse a hmelchhiatna chuan a khuh hneh ema, a huat theih loh.

K’u Muanga ah hian Mizozia tam tak a pai a, ‘miin cheng 2000 nei se zu in nachang hre si lo se a tan engnge sawt ang’ a tih te hian khatih hunlaia val thlunglu mawl inrenna chang hre lo a sawina a ni a. Mizo te a tlangpuiin thiamthil ngah zul thiam bik nei si lo ti ve thei zul, tei rei peih si lo te an ni a. Sawhthing hmun a siama, Hrangeka te’n an ruksak atangin kungfu a zir phaha, pistol pawh ‘a puak sa in a pai’ ta tah tah a, hlemhletna do turin a chuang chhuaka Khawnuam Sherrif a nih meuh chuan mipui chanai ei ruksak dan te, rawngbawltu zu dawm thei mai bakah eiruk thawhlawm a tam vanga rawngbawltua Kohhranin a hman, a sual tih sim duh si lovin Kohhran mipui te mit a tikham a, an tui loh phah a kaw dang an hreuh dan te tarlan a ni. Hrangeka piangthar thusawi chak’ Hall-a sawi khapsak a nih hnuah khawlaia puan in kaih a thuken danglam a sermon nasat lai kha Kohhrana mipui zia pholanna chiang tak a ni. Zofate chuan Kohhran Upa leh Pastor te an hmu ro a, Pawl chhuak te’n kohhran thar an dina, kil tinah Biak In a inhung ta fer fur a ni. Issue No 45-54 inkar kha Holy War tiin LSZ-a hian a vuah a. Pawl dang te chu tangkhawmin ‘Allies Party’ an din a, Hrangeka Pawl chu an beih rawn ta a. WW II laia Allies – U.S., Britain, France, USSR, Australia tangkhawm Allies Party leh Axis tih inphuaha tangho Germany, Italy, Japan leh a dangte. Tawngkam thar chher chhuah hi thil namai lo tak a ni a, a hmangtu mipui tam tak hneh tur chuan lam tawi fel, lam awlsam danglam a nih a ngai a, tum loh deuha slang hring chhuak a awm thei. ‘Kal ngial ang’ tih tawngkam a lar lai khan K’u Muanga tawngkam ‘Nguar ang’ tih chuan a rawn luah lan ti tih a. ‘Gui gui’ ama bungraw zing ami tho a ni a, a ri atangin K’u Muanga pumrua cher tak mai intheh vel dan tur mithlaah a awm thei mai tlat a ni. Character dang Darringaia, Linda, Judy, Pu Kapa, Hleizuama, Pu Gos, Pu Phunga, Shabito leh a pawlte khawsa zia chuan tualchhung politic leh Central inzawmnate a pholang a, politic-a Kohhran rawngbawltute in rawlh thatlohna awm thei pholanna a ni tel a; K’u Muanga’n a ruka a chhas a tihte erawh sawi tam ngai lo ah ngai ang. Lalsangzuala a fam ni khan Zofate chuan Arsi eng pakhat ziakmi te tan a mi hlu tak kan chan a tih theih a, amah ang kha Zofate hian kan nei tawh kher lo ang. RIP Laisaizawk.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?