Uchuak taka naute chhawrUchuak taka naute chhawr

Director General of Police chuan chanchinbumite kawmin Mizoram police-ten harsatna a lo tawhna thin police lal thenkhatin an naute mi mal thila an chhawr thin tih an hriat thu leh police pension tawhte’n ardali leh motor an la kawl zui chu chhui a nih thu a hrilh a. DGP chuan hma an lak thu leh laklet an nih tur thu a sawi bawk a ni.

DGP-in a sawi hi vantlang hriat thuruk deuh roh ni si a ni a, mipui lam atangin pawhin sawisel a ni fo tawh thin a, mahse a reh hlei thei lo chu a ni ber e. Sawrkar lam pawhin tihreh an tum thu te an lo tiri tawh thin a, hma kan sawn dawn emaw tih laiin police lal thenkhat tan a itawm viau ni tur a ni sawi a awm leh thin a nih hi maw.

Tun hma atangin police lal te zingah mi mal emaw, chhungkaw thilah emaw mahni naute chhawr ching an awm tih mipui lamin an sawi thin a. Constable thenkhat phei chu in saknaah rora leh cement chawhtir an nih thute a darh zauh zauh tawh thin a ni. Force-ah phei chuan constable te hi kutke ber an ni a, police te’n hneh taka hna an thawh theihna tur chuan an pute nen an inkar a that a pawimawh a, constable te tihphur thiam pawh a tul a ni. An chungah uchuak taka an pute an che nia an hriat chuan phur taka hnathawh a har khawp ang.

Pension tawh hnua an naute pawhbeh ching leh sawrkar rawih chauh tana lirthei te an la kawl lui zel hi chu thil dik lo hul hual a ni a, vantlang hmuhah pawh thil dik lo tih an hreh miah lo tihna a ni a, an huangtau hle mai. Police te chu hleih nei lo, dan leh thupek inbuk tawk taka lekkawh tura ngaih leh beisei an ni a. Hetih laia hetiang thil sawi tur awm fo hian police zahawmna thui takin a tichhe thin a ni.

He thil thleng fo thina sawi tihreh hleih theih loh DGP in a sawi chhuak a lawmawm hle a, huatthu suhah hnamdamg zawkin hetianga hma a rawn la hian ngaihtuahna a ti thui ang reng hle mai. Hnamdang kan huphurh viau lai hian kan thatpuina chin a awm thui thei niin  a lang tlat a Mizo police lal ni tawh zingah khawng tawk lo emaw dik tawk lo an awm em ni? tiin a ngaihtuah theih hial awm e.

Sawrkar department dangah pawh officer lawk zingah mahni naute leh driver te mi mal chhungkaw thila chhawr nasa sawi an awm fo thin a, thenkhat phei chuan a tur ve rengah an ngai tawh hial a ni awm e. Heng thu hi a dik a nih chuan uchuak taka an hna baka inchhawr hi dan phal bak a ni tih hriain tih chhunzawm loh a that a rinawm a. A theih phei chuan Sawrkar hian umzuiin hma la thei se a hnathawk tam tak lawmna a thlensak thei bawk ang. DGP-in a enkawl department siamthat tuma hma a lakna hi a fakawma, a keng tlang turah ngai ila. DGP hmalakna hi entawn tlak pawh a ni reng a ni.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?