Ukil te nuar chhunzawm zel; Sawrkarin hma la

Aizawl: Mi rethei tana ding thin Ukil (Defence Counsel) ten an lawmman chungchanga an thilphut tih hlawhtlin nan nawrh an la chhunzawm zel avang in Court chuan thubuai engemaw zat a ngaihtuah thei lo a. Ukil te thilphut hi tih hlawhtlin tumin sawrkar chuan hma a la mek.

Mizoram Bar Association Secretary leh Defence Counsel ni mek C.Zoramchhana’n Zalen a hrilh danin tuna a nawrh chhan chu hlawh tihsan lam ni lovin fee mumal tak siam an phut vang zawk a ni tih a sawi a. “Kum 2013 khan sawrkar chuan ni khata Rs.715 hlawh turin notification a tichhuak a, hetia Ukil senior leh junior pawh ang khat veka hrutrual hi a thalo nia kan hriat avangin siamtha turin kan ngen a. Law department pawhin kan ngenna hi ngai pawi mawhin August ni 4,2014 khan Ukil te chu chi thum ah thenin kum 7-15 service te chu nikhata Rs 600, kum 15-20 te ni khatah Rs. 900 leh kum 20 chunglam te ni khat ah Rs. 1500 hlawh turin an remti a. Mahse he ruahmanna hi vawi eng emaw zat ti hlawhtling tura kan ngen hnuah pawh tih hlawhtlin anih tak loh avangin kan nuar ta a ni,” a ti.

MBA Secretary chuan Ukil te chi 3 a then (3 tier rate) chu sawrkar tan senso a tlem zawk dawn nia sawiin, “Defence Counsel tam ber (90%) vel hi kum 7-15 inkar service an ni a, mi tlemte kum 15-20 service an awm a, kum 20 chunglam phei chu mi 2 chauh an awm a, heng mite phei chu an ding tam tawhlo hle a. Pawisa senbelh tur a an ngai hi a diklo a ni,” a ti a. An nawrh vangin Session Court a case 70% vel chu a kal theilo niin a sawi bawk.

Defence Counsel te thilphut chu tih hlawhtlin tumin sawrkarin hma a la mek tih Law Secretary Marli Vankung chuan Zalen a hrilh a. “Sawrkar thutlukna loawm tawh anih avangin a hlawhtlin theihnan hma kan la mek a, sum senso ngai zat turte kan chhut mek a ni,” a ti.

Senior Judge pakhat chuan Ukil te nawrh vang leh Ukil tel lova thubuai ngaihtuah theih a nih loh avangin nidang aiin Court a thubuai ngaihtuah a tlem deuh tih Zalen a hrilh bawk.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?