URBAN NAXAL CHUNGCHANG

Maharastra khawpui pakhat Pune atanga KM 30 vela hla thingtlang khua Bhima Koregaon-ah hian kumthar ni apiangin hnam hnuaihnung (Dalit-ho) an pung khawm thin a. He khaw te reuh te hian Maratha history-ah hmun pawimawh ang reng tak a luah a. Kum zahnih kal ta January 1, 1818 khan Koregaon hmunah hian East India Company sipai rual Mahar hnamte leh Peshwa sipaite an indo a. Chu indonaah chuan Mahar-ho chuan an aia tam fe zawk Peshwa sipaite chu an hneh a. Chu hnehna chu hnam hnuaihnung (Dalit) ten hnam chungnung zawk, anmahni hnehchhiahtute (Brahminical Peshwa) an hnehna a nih avangin Dalit history-ah a langsar zui ta zel a ni.

 

Mahar ho hi hindu dana hnam hnuaihnung, khawih thiang lo an ni a, B.R. Ambetkar-a ho khan thahnem tak chu Budhist sakhuaah an inlet nghe nghe. BJP kaihhruai sorkar a lo din hnu hian hnam hnuaihnungte Pa B.R. Ambetkar hian sawihnawm a tawk ta fo a, prime minister Modi-a leh RSS ho pawhin dem an hlawh zauh zauh nghe nghe. He indonaah hian British chakna hmanga hnehna chang ni mahse an tan chuan Brahmin-ho hneh kha a pawimawh ber zawk a. East India Company siam Koregaon-a Hnehna Lungphun phei chu an ngai hlu hle a. Kum tin he ni pawimawh takah hian an pungkhawm thin a. Kumin (January 1, 2018) phei kha chuan a kum zahnihna lawmna a ni nghal bawk a, kum dang zawng aiin an urlawk nasa a, pungkhawm pawh an tam hle a ni.

 

Bhima Koregaon hmuna pungkhawm te kha kum dang aiin an tam mai a ni lo a, an boruak pawh a sosang ru sa viau a. A hma ni (December 31,2017) khan a urlawkna atan Shaniwarwada Fort-ah punkhawm ‘Elgaar Parishad’ an tih mai chu buatsaih a ni a. Hei tak hi tun hnaia India ram nghawrnghingtu chu a ni. Police-te chuan Parishad-ah hian thusawitu thenkhat chuan mipui rilru chawktho thei zawng tawngkam hriam tak tak an hmang niin an sawi a, mahse, chanchinbu mite leh mi langsar tak tak – dan hre mite, mi harsate buaipuitu (activist-te), tlawmngai pawl hruaitute leh mi langsar tak tak an tel a. He hun kharnaah pawh hian Supreme Court judge hlui Justice PB Sawant-a kaihhruainain Constitution thlawpna thutiam leh Danpui venhimna atana inhlanna an nei nghe nghe.

 

A tuka Bhima Koregaon kum 200-na lawmnaah pawh chuan hnam hnuaihnung zawkte zalenna leh sakhaw tlem zawkte thlavang hauhna te, rethei bakberh te dinhmun chawisan te chu an punkhawm thupui ni mahse, an thupui ber ni a lang chu RSS/BJP te hindutva politics ep leh dodal a nih miau avangin buaina a chhuak hluai thei reng a ni. Hlauhthawn lawk ang ngeiin programme tan hmaa he hun hmang tura Bhima Koregaon pan kalte chu Hindutva group Shiv Prathishthan Hindustan leh Samasta Hindu Aghadi mi leh sa ni a sawiten an lo bei ta a. An buai ta luai luai a. Vanduaithlak takin mi pakhatin a thih phah hlauh mai a. Pune Rural Police-in buaina chhuak chungchang an chhui zui nghal a. Chumi kal zelah chuan June thla khan Pune police-ten activist panga an man a, anni hi Elgaar Parishad-a mipui fuihpawrhtu a puh an nih bakah Maoist-ho nena inzawmna neia puh an ni nghe nghe.

 

Thla riat dawn a liam hnuah thil thar a lo awm leh ta a. Thawhlehni kal ta (August 28) khan he Parishad-a mipui fuihpawrhtua puh mi panga dangte chu Maharastra police-ten ram chhung hmun hrang hrangah an man thut a, an man – Varavara Rao, lawyer Sudha Bharadwaj, Arun Fereira, Gautam Navlakha leh Vernon Gonsalves te hi activist langsar tak tak an ni bawk a, ram chhung a chiah hneh nghal hle a. Maoist-ho nena inzawmna neia puh an nih avangin boruak a lian hle a ni. Police-ten he punkhawm senso hi Maoist-te tum niin an sawi a, a tuka buaina chhuah chhanah hian he punkhawm hi an puh a. Chutihlaiin, a buatsaihtu zinga mi Bombay High Court judge hlui BG Kholse-Patil chuan pawl hrang hrangte thawhkhawm a nih thu leh Maoist-te tel ve anga an puh tlat hi (a buaipuitu zinga tel) court-a roreltu lo ni tawhte tihhminghliau tumna niin a sawi.

 

Heng thilthleng kaihhnawih tawngkam lar zui ta chu ‘Urban Naxals’ tih hi a ni. May thlaa Vivek Agnihotri-a lehkhabu chhuahah ‘Urban Naxal’ chungchang hi chipchiar takin a ziak a, ‘Hmuh theih loh India hmelma’ niin a sawi a. Buaina siam tura thalaite fuihpawrh a, sorkar dodal zawnga a ruka hmala thinte sawina a ni ber awm e. Mi fing tak tak, lehkhathiam, mipui chunglam, mi hneh thei tak takte an ni hlawmin a sawi a. Sorkar dik lohna hmachhuana mipui fuihpawrh a, a ruka buaina chawk chhuak thin te hi an ni. An hminghmerha sawi lang si loin mipui dikna chanvo humhalh tura beitu, huaisen taka sorkar dik lohna pholang thin te, sakhaw tih bikna hindutva policy dodaltute hi ‘urban naxal’-ah an chhuah titih der a ni.

 

Hetia mipui dikna chanvo humhalhtu mi thenkhat man an nih takah hian ram chhung hmun hrang hrangah sorkar sawiselna a ri a ring sawt hle a. Tunhnaia zirchianna (Mood of the Nation survey) ah khan BJP leh prime minister Narendra Modi-a te chungchanga mipui ngaihdan a tlahniam nasa hle tih tarlan a ni a. Firfiak taka hindu sakhua chawisan tumna leh hindutva policy hian India rama thendarh mek niin mithiamten an sawi fo bawk a. Sorkar leh ram hruaitute sawiseltuten beih an tawk ta fo bawk a. Firfiak taka thil kalpui an tumna avangin anmahni dodaltute hi an vaihma chho zel dawn niin an puh nasa hle a ni. Vivek Agnihotri hian twitter-ah thalaite chu heng urban naxal-te humtute hming pe turin a ngen a. Chu chuan boruak a siam lian zual a, mi langsar tak takten an chhang let a, ‘Kei pawh hi Urban Naxal ka ni e’ (#MeTooUrbanNaxal) tiin an tweet ve ta nghal sup sup a ni.

Chutianga, sorkar dik lohna sawiseltute leh thuneitute tih dik loh dodaltuten beih an tawh mek lai chuan tun hnai mai khan facebook group pakhata kan chief minister tawngkam hriam taka beitu pakhat pawhin man a tawk ve niin social media lamah kan lo hmu a. Invauna lam rawngkai deuh thil niin thenkhat chuan an sawi. Ram hruaitute hi an inluling a nih chuan sawisel leh dodal an ngaithei lo viau thin a. Mahse, mipui zalenna rama awm kan nih avangin khap beh ngawt theih loh mi huaisen, dikna duh, thil dik lo dodal ngam, mi dik lo bei ngam an awm zel dawn si a. Inthlan a hnai tial tial ang a, politics huangah dawt leh thutak chawhpawlha chhe tak taka inbeihna a lar leh dawn a. Chutiang, karah chuan ram leh hnam hmangaihtu mi dik, mi tak tak, mi huaisen leh rinawm te rawn tawng chhuak fo se.. kan politics tawp lutuk tur venna atan pawh a tha viau ang.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?