Vantlang ei tur a thianghlim tawk tur a ni

 

Food & drugs administration chuan July thla tawp lam khan khawpui chhunga ei siamna hmun tea stall, restaurant, hotel leh eisiamna hmun dangte an endika eisiam an sawngbawl danin hmasawn mahse a la thianghlim tawk lo a, 50% laiin phalna an nei lo tih hmuhchhuah a ni bawk.

Thianghlim taka eitur siam pawimawhna hi kan man chho tial tial a,ei tur duh uluk te chu chimlim emaw ti kher kherah ngaihna kan nei tawh lem lo a. Mahni inchhunga ei tur phei chu kan duh uluk tawh hle a, hetih lai hian pawisa chawia kan lei pawn lama ei tur kan lei thin te chu thianghlim taka siam a nih leh nih loh erawh kan ngaihtuah chiang lemlo fo niin a lang thei a ni.

F&D administration-a thawktute sawi dan phei chuan ei siam thin te an in thlahdah thawkhat hle a, chokaa zuk leh hmuam tihching an la tam hle a, kutkawr, lukhum leh apron te pawh an hmang lem lo niin an report bawk a ni. Thingpui dawr te chuan tam tak chuan vai tui chawi an ring tlangpuia, restaurant changkang deuhah pawh PHE tui an chhawp  mai thin bawk a a ni.

Tunlaiin natna inkaichhawn theih a awm nual tawh a, vantlang tui in tura chhawp an la tam te hi a mak ang reng hle mai, ei leh in a thianghlim loh chuan kawthalo, khawsik, tuihri leh natna dangte a darh thei hriat a tha a. Hemi piah lamah mithiamte chuan tunlaia natna thenkhat enkawl tak tak ngai zingah a darh dan hriatchian theih loh an nei hial tawh a ni a, a siamtu a fimkhur tawk loh chuan amah dawrtute a kaichhawng thei dawn tihna a ni a, fimkhur a tha hle mai.

Restaurant a hnathawk te bakah a neitute pawh nasa taka tanlak a ngai niin a lang a, thianghlimna kawngah an hnathawkte an vil nasat a ngai tihna a lang reng mai a, ngaihthah chi a ni lo ang. Danin a phut dan phei chuan registration emaw phalna lak ngai a ni a, 50% laiin hemi an hre miah lo te pawh hi ngaihtuah chian a ngai khawp mai.

Health department lam atang emaw sawrkar lam atang emaw pawhin ei siamte’n dawr an hawn dawnin phalna mumal tak lak an lak a ngai ngei ngei a ni tih hi hrilh hriat an nih a rinawm lem loh a, mipuiah pawh tlangzarh thin a ni ngai bawk lo a, dawr hawngtute’n an lo hawng mawl ve tawp pawh hi engti kawng zawng emaw tak chuan an demawm em em hran bik lo e.

Mahse, dan chu dan a nih miau avangin kan tan tlan a ngai khawpin a lang. Sawrkar hian phalna lak a ngai tihte hi uar takin sawi thin sela, ei siamte pawh danin a phuar a ni tihte hrilhin tehnaa tling lote chu dan hmanga hrem theih an nih thute pawh media kaltlangin hrilh mai thin sela a that a rinawm a ni.

Hemi rual hian mipui lam pawh an chanvo hrilha man chawia an eitur lei te chu thianghlim taka siam danin a phut tih leh chutiang ang tilo te chu thuneitute hnena hrilh hre turin fuih thin bawk sela hma kan sawn a rinawm a ni.

F&D lam hi an la mumal lo deuh a sawi a ni a, sawrkar pawh hian an mamawh te enpuiin vantlang hriselna khawih an nih avangin an mamawh te phuhruk sak turin theih tawp chhuah sak sela a pawimawh hle mai. Kan khawpui a lian lo a theihtawpa hmalak a nih chuan reiloteah he harsatna hi chu sutkian theih mai a nih a beisei awm hle.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?