Vishal vs MIMA

– Lalruatfeli

Tunlai titi tam leh thu inchuh anga lang thei, Vishal leh MIMA chungchang hi FB leh whatsapp group-ah chhiar tur a tam hle a, tute pawhin kan ngaihdan kan sawi bawrh bawrh a, article tha tak tak mi thiam leh chik mite atangin ngaihdan a lo chhuak bawk a, hre thiam lo tan pawh bengvarna tham a ni. Ram leh hnam himna tur nia kan hriat leh ngaihdan kan seng a, kan rilru put dan pawh a hriatthiam theih viau mai.

Vishal hian a tirah chuan anmahnia dawr inhawng (Company Own Company Operate) tum an nih hmel a, MIMA-ten an dodal tak avangin Franchisee angin an kal ta niawm tak a ni. Hei hi fake document nge a tak tak erawh hriat a ni lo.

Mizoramah mi nuai 12 vel kan cheng a, vai rama veng pakhat ang vel chauh kan nih laia hnam rilru kan pu lo leh hnam a chiang lo kan awm hi a vanduaithlak hle mai. Sumdawnnaah vaiin kum sangkhat chuang an kalpui tawh laiin Mizote chu kum 100 awrh kan sumdawng ve a ni a, tehkhin rual kan ni lo. Kum 2000 hma lama dawr nghaktute leh kum 2000 hnu lama dawr nghaktute chu danglam tawh tak an ni a, chutiang deuh bawk chuan office hnathawkte pawh kan danglam tawh hle a, polite tak tak kan ni deuh vek tawh. Kan hnathawh chhan kan hre tawh khawpin ka hria. Vai dawr tih hriat chian em em Mizovin ka dawr kan ti tlat mai hian pawisa engzat nge an hlawh ang aw ka ti thin. Engvangin nge dawr an siam ve mai lohva vai dawr chu an ta anga an sawi kher ni? Heta tang pawh hian hnamah kan chiang loin hnam kan hmangaih lo hle a, keiin a hlawkna chhete ka lo neih chuan ram leh hnam humhalh lam chu kan ngaihtuah thleng phak lo hle.

Vishal mega mart lo awm hi sawrkar hnathawk hlawh tam takte hian an duh zawk emaw a tihtheih. Kan tu leh fa, tuchhuan lo la awm zel turte hi sawrkar hnain min daih dawn loh avangin sumdawnna leh kuthnathawh chiah duhthlan tur kan nei a, tun atanga hnam kan humhalh loh chuan a tuartu tur chu kan tu leh fate (next generation) an ni. Hemi lo hmu lawk leh hrethiama MIMA-in Vishal duh lohna an lantir hi an titha hle a. Hetianga hma an la a nih rau rau chuan hnam dang sumdawng, vai mix zuar leh thirchhe zawngte atang hian hma la indo zel se la a duhawm hle. MIMA hruaitute hi hausa ve tak tak, nuai 100 tel nei an awm fur awm e. Anmahni chauh inngaihtuah nise he thilah hian an buai lo mai thei a ni. Mahse, ram leh hnam an hmangaih vanga hetianga economic assimilation bultanna tur anga ngaih theih Vishal an do hi an fakawm thlawt a ni. MIMA hian Vishal hi a do ngawr ngawr lovin ka hria a, hetianga Vai hausa tawntaw an lo awm tawh chuan company dang tana kawng hawngtu an nih theih avanga dodal niin ka hria. Tuna kan dinhmun leh rilru put dan en hi chuan Vishal anga super market hi kan ram leh hnam tan a la him rih lo hle a ni.

Mizo thalai tam takte hian changkanna emaw kan tih hi Cell phone leh incheina man to tak hi em ni? Sum leh pai kan lakluhte pawh a tlem emaw, a tam emaw, bank-ah khawl nachang i hria ang u. Kan hahdam ta lutuk leh fate kan duat dante hian taimak leh tihtakzeta ei hmuh aiin nuamsa taka ei hmuh tumnaah min hruai lut zawk a ang. Mipa fa chuan a chhungkua nupui fanaute chu a mawhphurhna a ni tih hriat a tha hle. Chawhmeh zuar, hawker, dawr nghak, office hnaah te hian mipa aiin hmeichhia hmuh tur an tam em em maite hi a zahthlak deuh em aw ka ti thin. Vai pakhat chuan khawlaiah hmeichhia eizawng hmuh tur an tam zawk si a, Mizo mipate hian eng nge an tih thin tih zawhna ka dawng a, chhan thiam a har khawp mai.

Kan rama mi hausate hi Vishal boruak atang hian harh chhuak thei ila a duhawm hle. Kan sum leh pai bank-ah daha a pung um mai lovin investment leh partnership-a company dinte hi tih nachang hria ila. Direct-in factory/manufacture-ah bungrua lain phai lam rate-in dawr lian tak takte din ve ila, Mizo mipuite thil tlawm lei theih turin chhawp chhuak ila; tin, thalaite tan hna tam tak kan siamsak bawk ang. Lehkhathiam tak tak, MBA pawh kan awm ve nual tawh a, heng kan thalaite tan hian hna i siamsak ang u.

A nghawng theihte:
Vishal mega mart an awm tawh chuan Big bazar te, Bazar India, Pantaloon, Electronics te, Hardware, Courier & Logisticste, te thlengin Mizoramah sumdawn a harsa lo a ni tih an hriat tawh chuan an lo lut zel tawh mai dawn a. Thla khatah nuai 100-500 kan ram sum chu a luang thla ang a, helaia chambang tur chu dawr luah man leh thawktute hlawh chauh a ni ang. Pathian ram thil pek sumdawngten sawma pakhat kan pek ve thinte pawh a tlahniam ngei ngei dawn a, Pathian ram zauhna tura missionary chawmna kan thawhkhawm hian a tawrh hun a la thleng ang. Tin, bank-in sumdawngte loan (Cash Credit) an pekte transaction a chhiat phah ang a, loan rulh theih loh vangin bank-in a tuar thei bawk. Dawr tenau, chhungkua chawm ve tawk tawkten an tuar ang a, heng zawng zawng ngaihtuah tel hi a ngai tak zet a ni.

Kan pi leh puten lu chhum ban chhum huama ram leh hnam an lo venna hi keini thangtharte hian kan humhalhin kan chhawmnung tlat tur a ni. Kan thenawm state-ah chuan a ram mi (native/aborigin) te sumdawng hmuh tur an awm ta lo. Hei hi hriain MIMA hian nasa takin an do a, CYMA pawh an ngawi mai mai thei lo. Kan do tlan a ngai hle mai. Kan vela hnam dangte hian min chimral hi an tum reng a, kan ram hi an it em em a ni tih hi i hrethiam ang u. Kan chak lohna/panna lai hriain thiam takin min thlem ang a, min la thlem zel ang, kan do tlat chuan tuman min hneh ngai lo vang. Mizote behchhan lo chuan an rawn awm thei ngawt bik lo tih hria ila, kan in leh dawrte Mizote chauh luahtir ila, thil lei tur pawhin Mizo zawrh ngei i lei hram hram ang u. An thil zawrh kan lei loh ngam chuan an awm rei ka ring lo, a chhan chu vai leh vaiin hlawkna tham leitu an awm dawn loh avangin. Kan inlungrual lohna lai leh kan sihhnipna laite hi keini ai hian an hre zawk si hi a buaithlak lam chu a ni. India ramah hian Maruari hnam hi sumdawnnaah a fawngchelhtu an ni a, an entawn tlak khawpin ka hria, an inzirtir a, an inchhawmdawl a, dawr nghak atana an hman thin kha an mahni pualin dawr an hawng ve leh mai thin.

Mipui rilru lam kan thlir chuan thil to uchuak tih hi sumdawngte sawiselna ber niin a lang. Dawr thenkhatah chuan dik mah se dawr zawng zawngah chuan a dik lovin ka hria. Dawrkaite pawh kan thil zawrh uchuak lo tura kan tlakhniam pawh a that ka ring. Krismas dawn leh off season-ah te hian SALE runpuite nei thin sela mi dangte tan malsawmna an ni ngei ang. Ringlo mite pawhin an sakhua hunpuiah an tih theih chuan keini ringtute tan chuan Krismas hi mi dangte kan tanpuina hun tha tak lo zawk se a duhawm khawp mai. Entirnan, Millenium Centre, Solomons Cave leh New Market-ah te hian bultanin FB leh Whatsapp Group-ah in sengso lovin information thawnchhuak sela mi tam takin kan hriat a awlsam zawk ka ring.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?