WhatsApp Hmangtute i fimkhur ang u – Er. Chhungpuia Renthlei

WhatsApp leh Mizo society hi a inmil hle a ni ang, thingtlang leh khawpuiah pawh kan hmang uar hle ta mai. Veng khat leh khaw khata mi pangngai chin tawh phawt chu WhatsApp group panga vel talah kan awm deuh fur hlawm ta mai!

WhatsApp group siamtute hian tum mumal tak neia a siam leh tha taka group an enkawl theih nan, group inkaihhruaina, siam chhan leh thil tum chiang taka tarlan fo a tul hle. WhatsApp group-a kan awmnaah thu dik lo leh cyber law kalha thu kan post darh chiam chiam hian cyber criminal case kan nei theih avangin fimkhur ang u.

WhatsApp hi Mizoten kan hmang nasa em em a, chhiatna lam, a bikin mithi ruang leh hliam thlalak kan thehdarhah te hian fimkhur a ngai hle. Chhiattawktuten huatthuah an lak chuan dan bawhchhiatna, hrem theih a ni. Tin, fiamthu uchuak thawh nan te, mi rilru tina, tichiai leh tithlabar thei thlalak post nana hman loh a him ber.

Sorkar file pawimawh leh chanchinbua mi phalna nei loa post darh emaw, tihdanglama post hi dan kalh a ni tih hria ang u. Mi dang aia post hma hrim hrim duh vanga chanchin chiang lo leh dikhlel taka post leh mi dang post vawrh darh chiam te, thu ngai post nawn teuh te hi sim a hun hle mai.

Tin, social media-ah harsatna kan tawk fo maite hi a pawi hle. Vawi khat post darh a nih tawh chuan khawvel pum a deng chhuak nghal thin tih hria ila, electronics media-ah keimahni chauh ni lo, kan chhungkua leh kan Mizo hmeichhiatpuite zahawmna tibawrhbang thei reng reng mobile/computer-a dah loh hi himna bul a ni.

Thlalak dukdaklo leh him lo leh zahmawh rawngkai thlalak dah, thehdarh leh thawn chhuah te, hetiang thlalak emaw thuziak like leh comment ringawt pawh hi dan bawhchhiatna a nih avangin IT Act, 008 Section 67 tlawhchhana hrem theih a ni.

Tunah hian India sorkar chuan khuahkhirhna dan, IPC section 34[3] leh IT Act 2000 Section 67 hmangin (Censorship laws) a kalpui mek a, mi eng emaw zat man an ni tawh. October 12, 2015 khan Latur district, Maharashtra state-ah WhatsApp group thu post control that loh avangin IPC section 153 leh IT Act 2000 section 34,67 hmangin group administrator leh member thenkhat man an ni. Tin, Oct 14, 2016 khan Jamtara district, Jharkhand-ah WhatsApp group administrator man a ni bawk.

Awle, awlsam taka information inpek theih a nih avang hian WhatsApp hi kan hmang uar zel dawn niin a lang. Hetih lai hian khawthlang ramten an tawh fo thin cyber crime pawh kan tâwk ve fo mai hi a pawi hle. Ram leh hnam dan kalha thil sual tih nan WhatsApp hman loh tur tih thu pawh chiang takin WhatsApp Legal Info (www.whatsapp.com/legal/) tarlan a ni. Englai pawha WhatsApp khawih rengte hi min tizahawm lotu a ni. Chintawk hria ila, thu post tur chi leh post loh tur thliar hrang thiam hram hram ang u khai.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?