YMA Day Vanduai- Vanhnuailiana Sailo

KUM 36 lai kalta kum 1979, June 15-a Silchar khawpuia Mizo fa awmte chunga thil thleng kha Zofate Political History-a thil pawimawh leh  theihnghilh mai  theih loh tur thil thleng a nih avangin, YMA DAY a lo thlen leh tâk avangin han tarlan leh hi a pawimawh hle a ni. Hetih hun lai hian Mizoram Assembly Constituency hi 30 a la nih lai  a ni a. Aizawl khawpui chhung pawh Constituency 4, chauh – Aizawl North, Aizawl South, Aiawl East leh Aizawl West te an ni a. Hetih hunlai hian Rural Devlopment Department hi Community Development tih a la nih lai a ni a. Kum 1976 lai atanga Community Development Department atanga (Food for Work Scheme) hnuai atanga Khatla  YMA Branch-in tanpuina a hmuh vete chuan tuna YMA Hall sak hi bultan a ni a. Mizoram Sport Council-in a tanpui zuinain he Hall hi sak zawh a lo nih takah chuan 15th June, 1979-ah  YMA Day nia  hawnna programme siam ani a. A hawngtu atan Transport Minister Pu Zairemthanga (RIP), Aizawl West MLA chu sawm nise tih a ni a. Programme ang chuan 15th June 1979 chhun dar 12:00-a hawn tura tih a ni.

Kan khuallian hi dar 12:00-a a lo thlen theih tak loh avangin a Office chu  Telephone-a kan biak chuan Silchar-ah buaina nasa tak a chhuah avangin Silchar Presbyterian Field Secretary, Rev. Lalpianga nupui, Pi Thahmingi  chuan  Minister chu a lenchilh avang leh he buainaah hian zuk kala chin fel dan ngaihtuah turin Chief Minister Brig.T.Sailo kal tur thlah fel hnuah a rawn kal theih tur thu hriat a ni a. Tichuan, kan biak atanga Minute 20 hnuah chuan a lo thleng thei ta a. Hall hawnna hunte kan neih zawha Hall sak dante report a nih hnuah chuan thu dang leng lovin Silchar-a buaina thlen dan leh buaina lo chhuah chhante niawma an hriatte chuan mipui vantlang kal khawmte thinlung chu a luah khatin thu dang reng a leng thei lo va.

Hemi kum June thlatir lama Pu Zoramthanga, MNF President thu chhuah (Quit Mizoram Order) an tih, Mizo ni lo hnam dang (Vai) te Zoram chhuahsan tura thupek vang nia hriatin Saitual PWD SDO, Pu RC. Chaudhuri, Silchar mi chu June 13, 1979 zanah Saitualah  thah (Kahhlum) a ni a. He SDO ruang hi Mizoram sawrkarin June 14, 1979 tlaiah khan Aizawl Club-ah thlahna hun hman zawhin Silchar lam zan dar 7:00 velah khan kalpui a ni a. A ruang zui tur hian Silchar mi Mizoram  sawrkar hnuaia PWD hnathawk Officer thenkhat leh Civil Department danga thawkte chu ruat anni hlawm a. Zanah thlen thlakpui a ni a. June 16, ’79, zingah chuan RC.Choudhuri-a ruang chu truck liana phurin, mipui a tama tamte chuan Silchar khawlai dung zawhpuiin nasa takin an aupui a. He an au hla thenkhatah chuan (Bengali tawng) “Mizo mipa in hmuh tawh phawt chu thah tur a ni,” tihte pawh hriat tur a awm thu Silchar-a Mizo awm Bengali tawng thiamte chuan an sawi  hriat a ni.

Hetianga buaina a lo chhuah hian Silchar – Mizoram Telephone line leh Inter State Police Wireless (ISPW) te chu tihchhiat nghal a ni a. Very hight Frequency (VHF) chauh hman theih a ni a. Silchar nena inbiak theihna leh chanchin hriat theihna vawiin ni anga mobile telephone leh internet a la awm loh avangin Chief Minister Brig. T.Sailo chuan Lt. Governor leh Home Ministry leh Assam Chief Minister pawhin rem an ti lo chungin June 15, ’79 tlaiah chuan Silchar chu a kal lui ta a. Zanlai velah thleng thlain Civil Hospital leh Thana-te a tlawh nghal ta a. He buaina chhuah tanna chu Rangirkhari atanga kawng zawh tanin Hailakandi Road lamah kalin Mizo an hmuh apiang an khawih ta mai a. Mizoram sawrkar motor an hmuh hmasak chinchang engmah hre lova anmahni tawk zawnga lo kal, Soil Conservation Department Motor nia hriat Tv. F.Rohlupuia, Tualte khaw chhuakte chuanna chu hal a nih bakah a chuangte zawng zawng chu Damdawi Ina dah ngai vek khawpin sawisak an ni a. He Silchar buaina hian mi vanduai bik pathumte phei chuan an nunna an hlauh ta nghe nghe a ni. He buai hlimchhawna Silchar lam a tlanchhe thla ve ta. Republic High Schhol Zirtirtu leh kan thian ni bawk, N.L.Chanda, B.Sc.-in a rawn report dan chuan he buaina a meizang hlaptu (Main Leader) chu Mr. Santosh Mohan Dev, Indian National Congress Member, Cachar Sport Council lama hruaitu ni bawk leh a laichin unaupa, Mr. Rana Dev, Devdoot Cinema Hall neitute an nih thute  chuan mi  a tibengvar hle a. Mithi pathum zinga pakhat phei chu Mosolman thlanmualah an phum hnuah an zuk phawrh leh ta kha a ni a. Khami tum buaina avanga Mizo tlangval Silchar-a  Mizote tanpui tura kal Lailapur atanga ram hruaituten a an dan kir tak thinrim lo hawte chuan M/S. Chhotelal Set & Co. te dawr leh M/S Monkumar Guha te dawr, Dawrpui venga an dawr chu an halsak ve a, Lala H.C Sarda-te dawr, Zarkawta mi chu suasam  ni mah sela an hal hman ta em lo a ni.

He Silchar buaina, Silchar mipuite siamchawp tuartu hi an tam hle a. Hliam tuarna zual zingah Professor Siamkima Khawlhring leh Tv. F.Rohlupuia leh Tv. Tlana s/o Major Sangzuala te hi thi lo vekah chuan a tuarna zual hming hmerha ka han sawi theihte chu an ni a. Hliam tuar thenkhat han sawi theih leh kan hriat theih danah chuan heng mi 13 hi an ni. (1) Pu.Lalliana, Ex. Navy, Mission  veng (2) Pu Vanlalhruaia, Chaltlang (3) Pu J.Thansiama (4) Pu Mangsavunga (5) Pu Thanzuala, (6) Pu Lalbiakkunga (7) Pu Lalbiakzuala. (8) Pu Lalnunzira, Headmaster, Sihphir (9) Major Lalchhawna, SA (10) Pu Malsawma (11) Pu Batula, Nepali Tlungvel (12) Khaizadinga, SA (13) Pu Prakash Thapa, Nepali-te an ni.

He Silchar buaina chhuak hi Silchara Indian National Congress mi leh sa. Santosh Mohan Dev-te chuan  an  hlawkpui hle a. Inthlanna awm hmasa lo awmah  chuan Lok Sabha MP a thlan tlin a ni a. Inthlan lo awm lehah chuan tling lehin Minister of State for Home Affairs a nih phah ta hial a. Hun lokal zelah kum 1989 Mizoram Assembly inthlannaah pawh thuk taka inrawlhin Representation of the People Act,1951 dante palzutin Election Rigging ni danga kan la hriat ngai loh leh thiam ve phak loh, Mizoram sawrkara Election-a thuneitute ngei hmangin Mizoram Congress Party chu sawrkarna siam thei tawk MLA Seat 20 chang theia siampuiin, sawrkarna an siam ta kha a ni a. Silchar buaina leh MNF mi leh satena tualthahna hmun hrang hranga an neih Politic boruakah PC Ministry-a Minister ding lai kum lama la naupang deuh ber, Pu F.Malsawma chu heng boruakte hian a tizam ta a ni ngei ang, Education Minister a nihna bansanin Congress Party a zawm phah ta hial a. He buaina hian Underground lamte pawh a tipawngpawrhin MZP atanga Underground thurualpuitute chuan Brig. T.Sailo sawrkarna tihchhiat leh tihmualpho a nih theihna tura an thil tih eng eng emaw zinga langsar zualte chu han tarlang ta ila: (1) 2nd  November 1981 (Thawhtan ni zing dar 2) hunlai velah tute nge tih hriat theih tura kut man loh MZP Underground nia mipui an rin leh hriatte chuan Pachhunga Memorial College leh Library Building; Republic High School, Mamawii Girls High School, J.L.High School, KM High School, Hrangchhuana High School-te an hal a. Mahse, a thente hi chu a kan nasat hmain a bulhnaia chengten an thelh hman a ni. Thelh hman zingah hian J.L. High School pawh a tel a ni. Pachhunga Memorial College Library hi North East India-a College Library-ah chuan lehkhabu nei tha ber a ngaih a ni a. Khatih hunlaia chhuta cheng nuaih sawmpathum  man lai a kangral kha a uiawm hle. Heng bakah hian Mizoram State Transport Bus thenkhat chu Ngaizel khamah nam lum a ni bawk.

Hetianga buaina karah hian Brig T.Sailo sawrkar  chuan 15th November 1980 Satellite hmanga Delhi thleng biak pawh theihna, Satellite Station, Khatlaa P&T Complex-ah a hawng a. Hemi bakah  12th November 1981-ah Bairabi relkawng laihna tur lungphum a phum a. 11th March, 1983-ah Grouping Centre (Khawkhawmna) atanga mahni khaw hmun ngaia kir leh theihna thupek Order a tichhuak bawk a ni. Kan sawi tak Santos Mohandeva hian  kum 1989 inthlanna chu inthlan hma kar hnih lai atangin Aizawl Circuit House-ah a ruka awmin, khatih laia Chief Secretary leh IGP te nen a inpawh taka awmin mipuiin a kan hriatpui si lohin election phuailuai taka neihpui (conduct) thu kan sawi tawh a. He inthlan hma lam huna inthlanna Returning Officer Mr. Clement Ilango, IAS, Aizawl Bawrhsapin a lo Trained tawh thintena kan hmuh dan chuan he inthlanna hi phuailuai tak  leh thlahdul taka inthlanna a nihna chu hetiangin hriat a ni. (1) Ballot Paper pek chhuah dan dik lo leh pek chhuahna hun leh Seal Covered a dahna hun chep lutuk kha a dik lo. (2) Ballot Box tam tak Election-naah khawiah mah record-na awm lovin hman a ni (heng Ballot Box te hi Cachar Distict-te ta hawh nia hriat a ni a, Private Building-a dahin record lova Presiding Officerte hnena pek chhuah a ni. (3) Inthlannaa duty tur Presiding Officer leh Polloing Officer te Trainning pek a mumal lovin a phuailuai em em a. Circuit House Annexed Building-a Trainning-na siam leh Ballot Box Demonstration atana eng emaw zat hman kha hmundanga pekchhuah leh tak loh kha Election dan phal loh a ni. (4) Trainning-na mumal loh avanga  Presiding Officer tam takin Ballot Paper hnunglama Signature pek ngei ngei tur an pek lohte pawh Valid Vote-ah chhiar vek a ni kha a dik lo. (5) Presiding Officer report-a Vote tla zat leh Ballot Box a tling khawm theuh kha en lova chhunpawlh vek a, Ballot Paper Account leh Ballot Box-a Vote tla chiang taka check-na awm lova vote tla chhiara puan nghal zung zung kha a rinhlelhawm. (6) Cicuit House leh Raj Niwas leh Aizawl Club, Election Box Vote thlak a nih hnua dahna kea inkalpawhna  mipui vantlang kawng eng emaw chhung mipui kal theih loh (Out of bond) a siam a ni kha thil dik lo tihna remchang atan lo chuan thil tul lo a ni.

Kan ramah hian dan dinglai  bawhchhiatna atanga Politic-a dinchhuah nana hmang mi tam tak an lo awm tawh thin tih hi tlang hriat a ni. Hemi tuma inthlanna (1989) buatsaih leh hlen chhuah dan hi chik taka ngaihtuah chuan Indian National Congress Central leh Mizorama mi leh MNF  hotu luten Brig. T.Sailo Political Career (Politic Hmakhua) tihchhiatna tur atana an beihrawnna niin a ngaih theih a. Mipui mi mawl zawkten kan duh taka kan thlante kan thlanna Vote min tihchingpensak takna nia ngaih loh theih loh, INTHLANNA TENAWM TAK  a nih avangin YMA DAY VANDUAI-in a nghawng chhuahte hi Zoram mipuite hian kan tuar kumkhuain kan neih tur leh kan nih tur hi kan thleng pha ngai dawn ta lo a ni tih i hria ang u. Hemi buaina Silchar lama Medical zirlaiten an dawnsawn dan chan chin thenkhat chu Mizoram Gov’t. Doctor Association (MGDA) Annual Megagine 2006-a chhuak phek 84-104-ah chhiar tur a awm.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?