YMA hi engkim a sulsutu a ni : Zodintluanga

Aizawl: UD&PA Minister Zodintluanga chuan, “YMA hi kan ram, kan hnam kalna engkimah a sulsutu a ni a. YMA tel lovin a kal theih loh a ni,” a ti.

Nimin Lungsen Hmar Veng in an kum 80 tlin an lawmna a hmanpuinaah he thu hi sawiin Zodintluanga chuan, “YMA kaltlanga ram leh khawtlang tana hun rei tak rawng ka bawl ve tawh hnuin rawngbawlna zau zawk nei tura ke pen chho zel ka ni a, ka kalna apiangah YMA inkaihhruaina hian min hruai zel a ni,” a ti a. YMA avanga khawtlang a nawm thu sawiin, “Ram leh hnam humhalh leh khawtlang siamthat hi YMA-in an kuta an dah tlat avangin khua leh veng a nuam thin a ni,” a ti bawk. Minister hian YMA Lungsen North Branch Hall siamthatna turin cheng nuai 20 dah a nih tur thu a sawi bawk.

Thorang bialtu MLA ni bawk Zodintluanga hian Zirtawpni khan Lunglei Circuit House-ah kumin fur laia Thorang bial chhunga chhiatna thleng avanga nunna chan ta te; Changpui-ah mi 2 leh Marpara-ah mi 3 te hnenah sawrkar atanga zangnadawmna cheng nuai li theuh a hlan a. Nimin khan Phairuangkaiah kumin fur laia chhiatna thleng avanga nunna chan ta mi 4 hnenah cheng nuai li theuh a hlan leh bawk.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?