Zaipawl World Cup-ah Mizo Cardinal Choir in silver medal la

Nimin (Inrinni) a neih zawh tak — khawvela zaipawl intihsiakna ropui ber — ah Mizo Cardinal Choir chuan Silver medal an dawng.

Zaipawl khawmpui lian ber hi a vawi khatna’n South Africa chuan a thleng a. Tshwane khawpuiah nghah niin, he ‘World Choir Games’ neih zawh taka Mizo Cardinal Choir hi ‘Mixed Chamber Choirs — category-a ‘The Champions Competition Final Round’ ah intihsiakna an hmachhawnin, pahnihna lawmman an dawng a ni.

Mizo Cardinal Choir (MCC) hian India No. 1 an nih ang ngeiin, India ram aiawhin Africa khawmualpuia khawvela zaipawl intihsiaknaah hian an tel a. An telna huang bikah hian khawvel ram hrang hrang atangin zaipawl 295 zetin intihsiakna dawhsanah lawnkaiin, an inel a ni.

Khawmualpui hrang hrang atanga zaipawl khawmpui lian a nih avangin, ‘Choir World Cup’ tia sawite pawh an awm a. Competition neih a nih mek laiin, choir tinte hian Gold, Silver, Bronze, emaw, “Successful Participation” awards dawn ngei tumin dawhsanah an lawn a ni.

The Champions Competition Final Round-ah hian Silver medalist ni tur hian Mizo Cardinal Choir hian hla pali (4) an perform a. He’ng hla pali (4) an perform-ah hian English hla pathum leh Mizo hla pakhat — Zawlbuk zai — an perform nghe nghe.

Mizo Cardinal Choir member zing a mi, Henry Varte chuan, “Min tawngtai puitu te leh min support tute zawng zawng chungah lawmthu kan hrilh mawlh mawlh a. Kan lawm khawp mai,” a ti.

World Choir Games-a Mixed Choirs category-ah hian University of the Western Cape (UWC) chuan gold medal an dawng a. He choir hi award-winning composer Sibusiso Njeza chuan a kaihruai a ni.

Kumin hian South Africa-ah ‘World Choir Games’ vawi 10-na hi nghah a ni a. July ni 4 atanga ni 14, 2018 chhung khat buatsaih a ni. Kum 2016 khan Sochi, Krasnodar Krai, Russia-in a lo mikhual tawh a ni.

Mizo Cardinal Choir hi khawvel hriat zaipawl ani der tawh. Nikum October ni 21 atanga ni 28, 2017 chhunga Sri Lanka khawpui Colombo-ah zaipawl khawmpui lian — Asia Pacific Choir Games and Grand Prix of Nations — a awm a, Asia leh Pacific huap zaipawl intihsiakah Mizo Cardinal Choir te chuan lawmman sang ber Gold Diploma pahnih an lo dawng tawh bawk.

He zaipawl khawmpuia zaipawl intihsiakah hian category hrang hrang a awm a, October ni 26, 2017 khan Mizo Cardinal Choir te hi Vocal Ensemble category intihsiakah an tel a, chutah chuan Gold Diploma an dawng a ni.

October ni 27, 2017 khan category hrang hranga gold diploma dawng chinte an inel leh a, chutah pawh chuan Mizo zaipawl Mizo Cardinal Choir hian gold diploma an dawng leh a ni.
——————–

# Kum 2000 atang khan ‘World Choir Games’ intihsiakna hmasa ber chu Austria Linz, Austria chuan a thleng a. Khatih lai khan, ‘Choir Olympic’ tiin a hming hi puttir a ni a. Interkultur Foundation in an organise niin, khawvel hmun hrang hranga ‘amateur choir’ te tana an buatsaih a ni a. An motto chu “Singing together brings nations together” tih a ni.

# He games hi kum hnih danah khawpui thlan chhuah bikah nghah thin a ni. Choir tel te hian category thlan bikah an tel theuh a. Kum 2012 khan category 23 awmin, “Music of the religions” tihte a awm a. Kum 2016 khan category 29 siam niin, chu’ng zingah chuan “Senior Choirs” leh “University Choirs” te a awm.

———————–

Facebooktwittergoogle_plusredditpinterestlinkedinmail

Comments

Leave a Reply

This site uses Akismet to reduce spam. Learn how your comment data is processed.

Login

Lost your password?