ZAWLNUAM SPECIAL CLINIC THUKHAWCHANG

News lama kan hmuh angin Indian Medical Association (IMA), Mizoram State Branch leh Mizoram Govt Doctors Association (MGDA) buatsaihin Zawlnuam ah ni 9 March khan Special Clinic buatsaih a ni a. Hotu lamte duhsakna avangin he clinic-ah hian ka zuk tel ve thei a. Nikum lam khan Tuipangah hetiang clinic-ah bawk hian ka tel ve tawh bawk a, lawmawm ka ti hle a ni. Ka rilruah thil tam tak ka vei zui a, chung te chu tun \umah hian ka han share chak a ni.
Hriselna lamah hian kan ram hi engnge kan dinhmun tih hi chiang zawka hriat chian a har viau a. Khawpui lama awm chuan kan ngaih pawimawh zawngte hi thingtlang lam nen chuan a lo inthlau thei viau mai awm e. Cancer hi kan tam hle a, state ang zawng pawhin India ramah hian kan sang filawr hle a ni tih chu kan hre fo tawhin a rinawm a. Khawpui lamah chuan nunphung a lo sang a, Lifestyle disease tia kan sawi fo, thisen sang (hypertension), zunthlum (diabetes) leh taksa rih lutuk (overweight) vanga ruh chuktuah lam fel lote hi a tam tial tial niin a lang a. Heng bakah hian Thyroid natna te, rilru lam natna (Pyschiatric Disease) te pawh khawpui lamah chuan kan ngah deuh zawk a nih hmel.
Inkai theih natna (communicable disease) lama kan dinhmun hi han en leh ta ila. Kum 2011-a India ram health status kan en chuan Malaria-ah te hian kan lo la sang viau mai a, hmarchhak state zingah pawh a sang pawl kan lo ni reng a. Naupiang thihna Infant Mortality Rate (IMR) te hi ram changkang leh kang lo tehfung atana an hman ber a ni a, chumi lamah pawh kan la sang viau mai bawk. HIV&AIDS te hi mipui kan tlem nen hian India ramah a tam zawngin pahnihna kan ni vung mai a, tuna a lan danah phei chuan pakhatna kan kai hmel riau lehnghal. Dengue Fever te hi 2011 khan India ram statistics-ah pawh kan lang pha lo a ni a, nikum chhung pawh khan kan hmu chhuak leh ta nual mai.
Aizawl lamah hian thingtlang lam damlo serious tak tak hi kan lo dawngsawng fo va, tam tak hi chu a tlai tawh hnu, enkawl dam an harsat tak tak tawh hnua rawn kal an ni fo. Heng damlo tam zawk te hi hriat hma theih an ni a, mahse hre hma pawh lo ni ta se tam tak hi chu sum leh pai lam harsat vanga rawn kal thei lo tur an tam a ni. Chumi a nih vang chuan an awmna khua a nih loh pawhin Primary Health Center hnai berah heng natna an lo hriat hma theih nana hmanrua leh enkawltu Health Staff te kan thuam \hat a ngai hle.
Thingtlang lamah hian Doctor indaih lohna a nasa hle a, doctor te an awmna hmunah pawh hian hmanrua leh staff indaih lohna a nasa em em ani. Khaw \henkhat ah phei chuan doctor an sawn avanga khawtlang an nawrhna te pawh kan hre fo mai. Kum hnih thum kalta khan IMA Conference-ah hian kan Chief Minister khuallian a kan sawm \umin Vote of Thanks petua min ruat remchanga hmangin regular taka Doctor tam zawk sawrkarah la ve turin ka ngen ve ngawt mai a ni. Kum tin hian Civil Service lam hi regular takin an la reng a, medical lam erawh an khat hle. Doctor awm loh vanga khawtlang an nawrh kan hre fo va, service dang an awm loh vanga nawrhna erawh kan hre khat viau thung si a nih hi!
Thingtlang lama kan doctor awmte hi an fakawm ka ti em em mai a. An inpekna a thuk a, hmanrua chau chung chungin damlo enkawl kawngah leh bial fan thu hlaah te pawh an ti \ha ka ti thlawt a. Kan Primary Health Center leh Community Health Center te hi tun aia changtlung zawkin han thuam \ha thei phei ila chuan thingtlang unau te hi hriselna kawngah pawh hma kan sawn zawt zawt theiin ka ring hial a ni.
Kan ram hi kan pachhe em em a ni tih hi a chiang a, hriselna lamah tal hi chuan tun ai hian hma kan sawn thei a ni tih erawh a chiang hle. District tina sawrkar Hospital te hi thuam \ha zual ila, Aizawl kal kher ngai lova natna enkawl thei turin hmanruate nei \ha zel ila, a enkawltu lam doctor te hi chu Quality Care pe thei turin an fit tawk ani tih a chiang khawp mai. Mipuite mi harsa \anpui kawngah kan harh thar mek zel a, khawpui lama thingtlang lam unau damlo rawn inenkawl te hi harsa tak tak an tam a ni tih hre thar ila, damlo harsa \anpui kawngah hian kan sum bawm i hawng zau teh ang u tiin chhiartute ka’n ngen ve ngawt che u a ni. Sawi tur ka ngah lutuk a, a thui lutuk loh nan ka duhtawk ang e. A remchan leh kan la chhunzawm leh dawn nia.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?