Zir dawna bond ziah tir leh kenkawh

Tunlaiin sawrkar chuan daktawr indaih loh avangin district thenkhata daktawr te a semrual a, Lunglei a surgery thiam chu hnathawk thei lova a awm avangin Serchhip-a mi sawn phei a ni a, Serchhip hmun ruak luah turin Kolasib a surgeon chu sawn chhuah tum a ni a. Kolasib chuan daktawr an neih chu sawnchhuah duhlovin hun rei tak an char bet a. Sawrkar chu a thu sut tura ngiatin National Highway hial ni 3 aia rei an dang char a. Serchhip JAC chuan Kolasib a surgeon 2 awm zinga a khaw mipuite’n an dan beh loh zawkah an lungawi thu an sawi bawk a. Ram mipuiin harsatna an tawh reng chu tha ti lovin sawrkar chuan Kolasib JAC ngiat chu tih hlawhtlin sakin daktawr sawn chhuah a tum order chu a thiat leh ta zawk a ni.

Ramin a mipui te hriselna a enkawl hi a mawh a ni a, medical facility in pek dan a zirin ram thang leh changkang teh na atan kan hmang fo thin a ni. Daktawr indaih hi a har hle a, kan ram chhunga state dangah pawh an indaih hlei thei lo a ni a, chawhrualin mi 1500 tan doctor 1 zel chauh an awm nia sawi a ni thin. Mizoram angah phei chuan daktawr posting siksawi emaw siamrem hi hna hautak tak tur a ni a, chona tling hial tham a ni e. Tunah hian daktawr 26 lai MPSC kaltlangin lak tur a ni mek a, hei hian thui tak chu kan harsatna a sutkian a rinawm a, a lawmawm khawp mai. Hetih rual hian hmalam pana kan kal zel erawh a tul khawp mai.

Daktawr zir tur te hi tam tak chu sawrkar suma zir an ni a, sum sen pawh sawrkar in a tum sak an ni a. Tun hma kha chuan an rawn zir chhuahin sawrkarin hna nghet a pek theih mai loh avangin sawrkar lam pawh a inveng a ni thei e. National Health Mission a awm tak hnu hian daktawr zirchhuakte tan hna awm mahse a nghet a nih loh avangin sawrkara luh chu an duh lo fo zawk thin a, hei hi kan mutanna lai pawh niin a lang a ni. Tuna zirthar te hi intiam kamna fel tak awmin kum 2 chhung chu thingtlanga posting-a kal ngei ngei tura tih an ni. Heng lo pawh hi ‘bond’ ziah tir an ni. Daktawr zir te hi a tlangpuiin mipui suma zir an ni a, cheng nuai sawm tel tak meuh sen sak an ni a, an lo zir chhuah hi chuan mipui mit mei veng ve deuh se a tha ngawt ang. Sawrkar pawhin ‘bond’ a siampui ang ngei hian lekkawh ngam bawk sela, tichuan kan harsatna hian zia lam a pan theih mai a beisei awm hle tawh ang.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?