Zohnahthlak inunauna

Mizoram sawrkar leh Mizo Cultural Organisation (MCO) huaihawtin tunhnai khan Mizo Hnahthlak International Cultural Festival hmasa ber chu R.Dengthuama Hall-ah hman a ni a, festival-ah hian Mizoram pawn hmun hrang hrang atangin Zo hnahthlak thahnem tak an rawn fuankhawm a, he festival hian Zofate insuihkhawm leh inunauna kawngah pen khat tala hma min sawntirtu a nih a rinawm.

Mizote hi ram hrang hrang India, Myanmar leh Bangladesh ah te thendarh kan ni a, ram pakhatah chuan awm ila chuan hnam chak tak kan ni thei a ni. Amaherawhchu, thendarh kan nih miau avangin inpumkhatna leh hnam hmasawnna turah pawh thiltih zung zung a harsa thin. Hetia ram hrang hranga thendarh kan ni chung leh India ram chhung ngeiah pawh state hrang hranga kan awm chung hian Mizoram hi Zo hnahthlak unaute hian kan inpui a ni reng a. Aizawl hi kan Jerusalem a ni a, a ni reng kumkhua ang.

Hmun danga kan unaute hian Mizote hminga ram kan neih chhun Mizoram hi an ngai em em thin a, chuvang chuan a bik takin Mizorama chengte hian nu leh pa chan kan chan thiam a, a tul hunah chuan tlawmna leh zawldawhna nen inhawng taka kan unaute hi kan en fo pawh a ngai ang. Zo hnahthlak zingah hnam hrang hrang leh tawng hrang hrang hmang kan awm a. Mizotawng kan tih mai ‘Duhlian tawng’ hi kan hman tlanglawn ni mah se thiam lo tam tak an awm a; mahse, tawng an thiam loh avang khan Zohnahthlak an nihna kha a bo chuang lo. Chuvangin, tawng chungchangah a ni emaw, ei leh in a ni emaw, incheina leh thil dang pawh lo dang thin mah se thlahtu thuhmun, thisen zawmpui kan nihna hi a thuk zawk tur a ni.

Mizote kan vanneihna em em mai chu kan ram hruaituten Zofate insuihkhawmna leh inpumkhatna an vei em em mai hi a ni. Political party hrang hrangte hian an Manifesto-ah helam hi an telh deuh vek zel a, hetianga ram hruaituten an vei reng chuan nakin lawkah rorelna pakhat hnuaia kan awm theih pawh a la rinawm a. Chutiang em a thleng lo a nih pawhin unau kan nihna hi hre tharin kan inhnaih tial tial ang.

Zo hnahthlak hnam hrang hrangte hi hmun khata awmkhawm pawh ni ila kan vela hnam dangte ngaihtuah chuan tlem tak kan la ni dawn tho a ni. Hnam tlem an zahawm ngai lo va, an chak ngai lo bawk. Chuvangin, tuna Zo hnahthlak hnam hrang hrangte hian kan inrem lohna te dah thain leh khawvel pawhin min hriat theih nan inpawh lehzuala kan inunauna hi kan tihchak a tul. A bikin Mizorama chengte hian Mizoram hi Zofate ram neihchhun a ni tih hriaa Aizawl pawh an Jerusalem a ni tih hriain lo huikhawm leh duat kawngah tan kan lak thar a ngai hle mai. Zofate hi hnam chak leh thiltitheia siam turin Mizorama chengte hian mawhphurhna sang tak kan nei tih hre thar leh ang u.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?