Zohnahthlak rorelna khat hnuaia awm

Zo Reunification Organization (Zoro) chuan Lushai Conference huaihawtin Chief Minister Lal Thanhawla chuan Zo hnahthlak insuihkhawm theih nan theihtawpin sawrkarin hma a lak thu a sawi a. ‘Chak taka ke pen a nih chuan kan tum ram hi kan thleng thuai theiin ka ring a ni,’ tiin a sawi a. Sawrkar 3 hnuaiah Zofate chu awm mahse chhul khat kual nihna a bo chuang lo nia a rintlat thu CM chuan a sawi bawk a ni.

Zoro Conference ah hian MNF President Zoramthanga pawhin thu sawiin “ Kan vaiin mawh kan phur,’ a ti a, mahni awmna theuha hmalak a pawimawh a tih thu a sawi bawk a ni.

Kan state thenawmah hnam/hnam tesep tam tam an awm a, an inkarah innghirnghona lian tak tak a thleng thin a. Nunna te pawh vawi duai lo an lo inlak sak tawh thin a ni. Tun dinhmunah pawh hian ram khata cheng nisi Chi/Kuang/Hnam Tesep inan loh avang hian a bila inlak hran duh an awm fur a, a thente phei chu hun rei tak chhung inbe hlei thei lovin an awm tawh a ni. He rilru puthmang hi a awm reng a ni. Hemi hmatheh hian hel pawl hial te pawh an indin phah tawh a nih kha. Hmarchhaka state thenkhatah chuan insuihkhawm aiin chibing hmanga inthendarh duh an awm fur a, chu chu tuna dinhmun pawh a ni.

Zohnahnthlakte erawh chuan inthendarh chu tha lo hle nia hriaiin state 3 ah awm darh mahse inzawmkhawm dan an la ngaihtuah mek zel a. A tuipui pawl kan neite hi a hlu a, a pawimawhna hriaa ‘engtik niah emawa inzawm khawm la ring tlat’ hruaitu kan nei te pawh hi a lawmawm a ni. Hei hian mipuiah nasa takin beiseina eng a pe a ni.

Hmahun hriat ni lo mahse rinna leh beiseina tak tak nena ke pen chuan Zofate hi rorelna pakhat hnuaiah kan la awm theih a rin awm a ni. Sawrkar 3 hnuaia awm mek Zofate zingah Mizoram chu nu leh pa chan chang tur ber chu a ni a. In pui nghaktute kan zir hle a ngai dawn a, thangthar zawk te hnenah pawh unau kan nih dan inhrilh chhawng zela; kan inlaichin tawnna dan te intuh a pawimawh dawn a ni.

Hleih nei lo rilru put a ngai a; mahni hmasialna chu inpumpeknaa thlak a ngai bawk ang a, dawhtheihna namenlo a tel a tul bawk ang. Heng mai hi a la ni lo va, a ruala pen thiam in kawngro a su hle bawk ang.

Engpawh nise, tunah a takin awm ho theilo mah ila thinlunga kan awm khawm zel theih nan hmalam panin ke pen zen ila!

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?