Zoram mamawh chhanna

– Lallianchhunga

LAD leh SIRD & PR bul tumin June 28 (2017) khan New Secretariat Conference Hall-ah ‘Extended Consultation Meeting on Conversion of Village Council into Panchayati Raj in Mizoram’ tih chungchang zir hona neih a ni a. He Consultation Meeting a lo tel tura sawm bik Political Party hrang hrang, Aizawl khawpui chhung College a helam hawi subject zirtirtute, Autonomous District Council hotute leh pawl hrang hrang aiawhte’n Village Council leh Panchayati Raj inanna leh danglamna chungchang sawi hona an nei a; Village Council leh Panchayati Raj Institution that tawk lohna leh an thatna chungchang te, leh engtiangin nge Mizorama kan hman mek Village Council (VC) hi tuna aia tha leh changtlung zawka siam a nih theih ang tih te sawi ho a ni a. He meeting hi ‘inrawnkhawmna’ ang a kalpui a nih angin thutlukna engmah siam a ni lova; sawihona a thusawitu te sawi erawh fel taka chhinchhiah a ni thung.

A tobul: Nikum (2016) Dec.16-18 khan Kerala a ‘National Writeshop on Role of Gram Panchayats/Village Councils in Attainment of Sustainable Development Goals’ neihah SIRD & PR Senior Faculty pahnih, Khuangthansanga Pakhuangte leh Dr.Margaret Lalbiakthangi, leh Dorothy Muansangi, Asst.Director, LAD te an zuk tel a; he ‘zirhona’ in a tum ber chu United Nations in thingtlang mipuite tana hmasawnna ngelnghet tur a duan te hi Panchayats/Village Council te’n engtin nge an tihhlawhtlin theih ang tih a ni ber a. Hemi tuma kalte ‘tour report’ hi LAD hotute’n ngun taka an ngaihtuah hnuin Mizorama VC te hi thingtlang mipuite hmasawnna hmanraw tangkai tak an nih theihna atana buatsaih dan kawng dap turin 16th Jan.,2017 khan Study Team an din ta a ni.

He Study Team hian kan thenawm State, Tripura leh Sikkim te’n an thingtlang khuate hmasawnna atana an ‘tualchhung sorkar’ neih Panchayat te an hman tangkai dan te a zir tawh a, heng atana senso zawng zawng hi SIRD & PR, Mizoram lamin an tum a, State danga an thawhpui SIRD lamin ruahmanna fel tak an siamna hnuaiah an ‘tualchhung sorkar’ a mipuite thlantlin Gram Panchayat leh Zilla Panchayat member te nen inpawh taka inkawmhona kan nei thin nghe nghe a ni; keini anga Village Council an neih ve loh avangin kan VC te tlukpui an ‘tualchhung sorkar’ te hi zir kan ni a. Hemi atana LAD leh SIRD & PR hotute inpekna hi a thukin a chhuanawm em em a, ram inrelbawlna siamthat duhna rilru atang hmala tak tak an ni tih a hriat.

Anni leh keini: Study Team hian State pahnih lek kan zir chiang chungin thingtlang khua a ‘anni leh keini’ danglamna hi tam tak sawi tur a awm. Heng ‘danglamna tha chi’ te hi an ‘tualchhung sorkar’ hmanga an neih a ni. An ‘retaining wall’ rem a rinawm, an step quality a tha, pavement (kawng sira ke a kalna) pawh keini aiin an nei tha zawk, thingtlang khuaah pawh vantang kawngpui nek rana In sa hmuh tur an awm lo; vantlang thil reng reng him takin an awm vek emaw tih tur a ni. An ‘tualchhung sorkar’ bulthut hi ‘Gram Panchayat’ an ti a, keini’n ‘Village Council’ kan tih ang hi a ni; an Zilla panchayat ang erawh district level-ah kan nei ve lova. An huamchhung thil pawimawh rel turin keini aiin ‘vantlang inkhawm’ an nei zing zawk a; Gram Panchayat chhunga ‘bial’ mipuite’n an ‘bial’ chhunga hmasawnna hnathawh tur an thlang chhuak a, chumi mil chuan hnathawh a ni a; kum tawpah hnathawh zawng zawng leh sum senso lanna ‘Annual Report’ an tichhuak leh a; hmasawnna atana hnathawh tur relnaah mipui an tel a, hnathawh hriatpuitu mipui an tam poh leh an kalphung a langtlang a, chu chuan hlemhletna awm tur nasa takin a veng a, chuvangin vantlang tana hnathawh reng reng a tha bik lo thei lo a ni. Sorkar atanga tanpuina dawngtu tur pawh mipui kalkhawmin an thlang thin.

Keni chu a letling thawkin kan kal a, mipui tel ve theihna a tlem avangin ‘kalphung langtlang’ a awm ve lova, chuvangin hnathawh tha leh thalo chu a ‘thawktu’ (contractor) rinawm leh rinawm lohah a innghat ringawt a, ‘hnathawktu rinawm’ an tlem avangin thingtlang khua a vantlang thil tam tak te hi chhe tak tak a tam phah a ni. Heng khaw chhung hmasawnna atana hnathawh tur thlannaah mipui tel ve theihna ‘kalphung’ (system) kan neih loh avangin ‘kalphung langtlang’ a awm lo va, sum leh pai tam tak a luanral tawhna hmunah pawh hmasawnna tak tak hmuh tur a tlem phah a nih hi. Sorkar atanga tanpuina dawngtu tur (beneficiary) pawh khaw chhunga ruling party member ten an thlang zel a nih hi! Hetiang dinhmuna kan dinna chhan chu kan ‘tualchhung sorkar’ neih ve Village Council hi mipui tel tam theihna tur leh ‘langtlang’ tura thuneihna mumal tak pek an nih loh vang a ni. Tuna kan Village Council te hi kum 1953 daih tawha ‘dan’ siam The Lushai Hills District (Village Council) Act, 1953 leh hemi hmanga ‘dan tesep’ (Rules) an siam hrang hrang hmanga enkawl a nih avangin khawvel hmasawnna mil zel a ‘thingtlang mite tana hmasawnna ngelnghet’ kalpuitu tur atan a chak tawk lo tih kan hre mai awm e.

14th Finance Commission thukhawchang: 14th Finance Commission Report Vol.I Chapter 9 kan chhiar chuan ‘tualchhung sorkar’ hnena thuneihna pek a ngaihpawimawh zia kan hria ang. Thuneihna mumal nei lo ‘tualchhung sorkar’ hnena sum leh pai pek teuh teuh hi a bothlau theihna ‘chance’ a sang tih a hriat vang nge India Danpui Siamthat 73-na hmanga din tur Panchayati Raj awm lohna ADC hmanga inrelbawlna, heng Meghalaya, Mizoram, Tripura & Assam a tribal area te, Manipur tlangmite leh Nagaland te tan kum 2015-2020 chhung atan sum leh pai pek tur engmah ‘rawtna’ a siam ta lo a ni.

Heti chung hian Mizoram sorkar chuan ADC 3 leh Village Council te tan Sorkar laipui atangin sum leh pai dilna a buaipui reng a. Chief Minister leh Chief Secretary te’n ziaka Sorkar laipui hnena an thu thlen te leh Danpui Article 275 (1) hmanga ADC te tana sum dil chhuak tura Mizoram Sorkar hotute hmalakna kal mek te pawh a awm bawk a. Heng hmalakna kalmek te hi LAD changtu Minister chuan Consultation Meeting a lo kalkhawmte hmaah chiang takin a sawi nghe nghe a; political party aiawh te tan pawh lakkawih luih tur engmah awm lo khawpa fiahin a sawi a.

ZNP President Press Statement kha: Consultation Meeting-ah ZNP party aiawhtuin chiang taka an party duhdan leh ngaihdan te a sawifiah a, pawl aiawh lo kal zing atang phei chuan a sawi ngun ber hial a; heti chung hian July 3 khan ZNP President hian Press Conference koin an party duhdan sawi nawn lehin zawhna pahnih a zawt a; heng a zawhna chhanna te Consultation Meeting neih hma daiha an sem ‘working paper’ ah chiang taka inziak sa te, Consultation Meeting ni a LAD changtu Minister thusawi leh 14th FC Report Vol.I page 121-na an semah chiang taka tarlan sa vek te an ni a. Khangte kha lo chhiar selang chuan Press Conference meuh koa zawhna siam a tul kher lovang.

Kan Hmabak & Tihtur: India Danpui Art.243M in Panchayat nei lo thei tura a phalsak State zingah Mizoram hi tel mah ila kan ‘tualchhung sorkar’ neih Village Council te hi thuneihna tak taka kan thuam phal leh si loh chuan 15th Finance Commission pawh din leh mahse sum leh pai thahnem tak, thingtlang khua te hmasawnna tham lawih min pek phal a rinawm chuang lo a ni. Kalphung langtlang lo, sum leh pai hmanna tur hmasawnna hnathawh dan tur rel felna a mipui tel ve theihna remchang awm mumal lohna Village Council te tana sum leh pai pek teuh kha tute emaw ipte tihpuarna mai maia a chan an hlau a ni. Chuvangin, Sorkar laipui pawm tlak a kan Village Council te hi kan siamrem vat vat a hun ta hle a ni.

Ram inrelbawlnaa a chhawng hnuai ber, mipui rorelna innghahna lungphum (foundation) hi a that tawk loh chuan a ler atangin politics hi a siamthat tak tak theih chuang loh. A chhawng hnuai bera awm mipuite leh an inrelbawlna ‘tualchhung sorkar’ atanga ‘kalphung’ (system) hi siam that a nih loh chuan hmasawnna ngelnghet tak tak hi a thleng har viau tih pawh kan tawng chho mek a nih hi!

Tlipna: Consultation Meeting a sawiho tur ‘Working Paper’ buatsaihtu leh sawitu ka ni a. Khami ni a party leh pawl aiawh te thusawi atanga lang chiang tak chu tuna kan VC te dinhmun hi tihchangtlun a ngai a, chu chu thuneihna tam zawk pek a, sum leh pai sen belh lutuk lem lo pawha thuamthat theih an ni a; sum leh pai sen belh ngaihna pawh lo awm se nakin zelah sum leh paia thingtlang khua te’n hlawkna an hmuh theihna zawk tur a ni bawk. Sorkar hotute pawh hian vairama an hman an ‘tualchhung sorkar’ aia tha leh changtlung zawkin Mizoram VC te hi siamthat an duh a, chu chu ram inrelbawlna ‘kalphung’ (system) siamthat bul intanna a ni tih pawh an hria. Amaherawhchu, a hun hmaa politics a thangthat lak tuma he hmalakna kal mek lo ‘politicise’ erawh ‘kalphung siamthat’ duh vang a ni em tih hi zawhna awm thei a ni a; chuvangin, tuna hmalakna kal mek lo ‘politicise’ hi Zoram chhunga VC awpna hnuaia mipui awmte mamawh chhanna ni loin, a la hun lo hle a ni.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?