Zoram Ni a lo thleng leh dawn ta

March 5 a lo thlen dawn hnaiah hi chuan kum 51 kal ta a India indo thlawhna chhuanvawrten Aizawl khawpui leh Mizoram khaw hrang hrang an rawn ral beih chiam kha hriat chhuah loh a har thin. March 1,1966 ah MNF in zalenna an sual tan a, khaw hrang hrangah hnam sipaite leh India sipaite an indo nghal a. Kum 2008 atang khan mumal takin Aizawl a bomb thlak champha pual hian hun hman thin a ni a. A tirah chuan Zoram Ni organizing committee leh MZP tangkawpin an buaipui thin a, tun hnuah chuan MZP bul tum a Zoram Ni hi hman thin a ni ta a.

Aizawlah chuan March 3 atangin Volunteer-ten India sipai (Assam Rifles) an kap tan a. Sipai lam hian tui an nghei tan a, an chan a chhe chho bawk a. Inpek mai te pawh an sawi deuh a ni awm e. Mahse, Assam Rifles hian biak hlatna (WT) hmangin an dinhmun hi an thawn chhuak reng tih a chiang a. Tichuan, March 5,1966 chawhnu lamah India Jet fighter paliin Aizawl khawpui chu an rawn bei ta mai a.

Sipai tangkhangte chhanchhuak tura rawn thawk mai an ni lo tih a chiang a, bomb leh puakrangin mipui awmna lai, Thakthing bazar te, Khatla te leh hmun hrang hrang an rawn bei chiam mai a ni. Chumai a ni lo a, MNF volunteer ho an insaseng hnuah sipai an rawn chhuak a, Dawrpui pheia dawr leh in kang bangte an hal zui bawk.

India indo thlawhnaten bomb leh silai hmanga Aizawl mipui an beihnaah hian hriat theih chinah mi 13 an thi a, in tam tak a kang a, in leh lo, bungrua leh thil hlu tam tak a kang ral a. Mipui an darh chum chum a, Zofate innghahna khawpui ber chu min awptu sorkarin hmelma beiha a beih avangin a sawp chhe zo ta a ni ber. Kum 50 a liam hnuah hi chuan rilru fimin thil kal tawh te kan chhui let thei ta a. Chuvang chuan India-in a sipaite a chhanna lama zalenna sualtute (MNF volunteer) chauh bei lo a, rawng taka a mi chengte a bei mai hi hriatthiam a har tak zet a, hnam dangte pawhin mak an ti a. India sorkar pawhin tun thlengin insawifiah ngaihna a la hre lo a nih hi.

Tunge mawhphurtu ni ang? Khua leh tuite indo thlawhna hmang meuha beih hi thil namen a ni lo a. Sipai hotu lawkte thutlukna siam mai a nih pawh a rinawm loh. Khatih lai kha Indira Gandhi kha prime minister a nih hlimchhawn lai a ni a. Prime minister fel leh nunnem tak mai Lal Bahadur Shastri a thih thut avangin congress party chhungah inhruipawhna a awm nghal a. Chutiang karah chuan Nehru-a fanu Indira Gandhi, Rajya Sabha MP term khatna hmang mek kha prime minister a ni ta a.

An party chhungah inhruipawhna boruak a awm a, India ram economy tlak hniam lai a ni a, Pakistan nena indo zawh hlim hlawt a ni a, chumi hmain China-in a run tawh bawk a. Chutiang harsatna neuh neuh karah chuan Pi Indira Gandhi khan (thla khat vel chauh prime minister a nih laiin) Mizoram buaina a hmachhawn ta thut mai si a. He buaina hi hmehmih nghal a tum tih a chiang a, chuvangin, zalenna sualtu hnam sipaite mai ni loin a hnam ang pawhin na taka a rawn beihtir a nih te pawh a rinawm khawp mai.

Indira Gandhi hi, zep nak emaw, India prime minister zinga rura ber, rawng ber a ni. A hun laia thil thleng chhuikir hian a duhnaah chuan pawisak a nei lem lo tih a chiang. Tin, bomb thlak tur chuan prime minister leh home minister thutlukna a nih ngei a rinawm bawk. Chuvangin, khatih laia India prime minister zinga rura ber Indira Gandhi leh home minister tha lo tak kan tawng hlauh kha Zofate chanchina hun thim lo thlen chhan pawh niin a lang.

Zofate zinkawng a hun thim ber intan chhoh lai, jet fighter hmanga Zofate khawpui ber Aizawl beih champha hi Zoram Ni ti a vuah a ni hi a inhmeh viau a. Kumpinuin kan ram a chhuahsan hnuah kan ngaihsan lem loh vaihoin min awp zui ta a. Vaiho awpna hnuaia kum 20 dawn lai rethei tak, ngaihsak hlawh tawk lo leh kawng hrang hranga lungawi lo taka kan awm laiin hnam pasalthaten zalenna an sual ta a.

Silai an lek hma hian MNF hian vawi duai lo kan hnam chungchang hi Assam sorkar leh sorkar laipuiah an thlen thin a. Mahse, an duh ang chhan an hmu lo a, an lungawih lohna a zual zel zawk a. Tichuan, sawi tawh angin March 1,1966 ah independence an puang ta a ni. Thil pawi ta em em chu prime minister nunnem tak Lal Bahadur Shastri lo thi hman kha a ni. Ani kha chu la dam se, zalenna sual laia mipui tawrhna nasa lutuk kha a thleng kherin a rinawm loh.

Engpawhnise, zalenna sual ngam hnam kan ni hi kan chhuanawmna lai chu a ni. Kumpinu awp hnam zingah khan zalenna sual ngam lo hnam an tam hle a, a sual chhunte kha chu an intithei viau a ni. India pawhin tun thleng freedom fighter a la buaipui zui hi. India hnuaiah pawh hian duh reng vang ni lo a rin luh kan awm nual a. Chung zingah chuan hmarchhak bial atangin Naga-ho leh Mizote hian tih tak takin zalenna kan sual ngam bik a ni. Khawvel history-ah pawh hian hneh lo buan ngam khawpa huaisen te, sorkar chak zawk bei ngam khawpa sipai huaisen te chanchin hi a ropui lai chu a ni thin.

Mizo hnam hi a la awm zel a nih chuan thangthar an lo chhuak zel anga, kan hnam pasalthaten huaisen taka an cho rual loh India sorkar an do ngam leh zalenna tura an martar ngam kha an la fak zual zelin a rinawm.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?