Zoreka

David L.Ralte
Six String Cabin, Durtlang North
Hman ni lawka Chakma issue avanga MZP leh police-te an innawr tum khan hnam rilru atanga thlir chuan thil duhawm lo tak tak thleng a awm nual mai. Kha mi tuma thilthleng tam tak zinga a hnua umzui hlawh ta ber nia lang chu-kan Mizo Police officer pakhatin zirlai pungkhawm zinga mi a nghawnga a rek kha a ni. Kha video leh thlalak ka hmuh phat khan natna khuma mu reng e ti lovin, awmhmunah hachang min thial tir bap bap mai! “Hepa hi Mizo pure a ni lo a niang a, khawi venga awm nge niang le,ka khawih ve phaka a awm lo hlauh chu a va han vannei tehreng em!!” tihte chu ka rilruah a rawn lut nghal zut zut mai.

Police hian kei chauh min tithinur hauh lo. A hnuah a deusawhna tawngkam dengkhawng tak tak leh a hming, a awmna veng, chumi office hnung deuhah… tih vel Social media-ah a rawn lang nghal chuai chuai a. A hming lemah pawh ZOREKA tih hial phuahsak a ni ta nghe nghe tih kan hriat vek kha. A hnu deuha thuthang kan hriat pakhatah chuan hepa hian Facebook-a a account pawh a deactive phah daih tihte a ni. Hei hi tak tak pawh nise a awm khawp mai. Amah mai ni lo, a chhung leh khat, thian thate tan pawh thil zahthlak tak a tling tlat.

Mahse maw..!! Hepa (Zoreka tiin kan sawi tawh mai ang) chanchin atang hian bengsika thil ngaihtuah tur a awm ta. Pakhatnaah chuan, a video kha chiang zawk leh chik zawka en chuan, Zoreka khan zirlaipa kha a nghawngah a lo rek tak tak hleinem le tih a hmuh theih ta tlat mai. Amah tantu thenkhat phei chuan ‘mi mal taka tihmualpho tumtuin a rek ang thei ber tur angle atanga a lak a ni’ tihte a ni ta. Tin, Zirlaipa khan (Zoreha khan) a bula police hmeichhia kha khawih a lo tum a, chu chu Zoreka khan a lo namsawn mai a ni.. tihte a ni leh ta zel a. Chuti a nih chuan, Zoreka kha Zopuia a va ni zawk ve. Dem loh tur zawk kan lo dem vak te pawh a ni mai lo maw? Hetih lai hian Zoreha kha hnam issue a nih vangin ama hlawkna leh hamthatna tur pawh ni miah lo a hrawka reh hrep pawh huama kha mi hmuna a kal kha a va fakawm em! Hnam issue hi thil dang atanga thliar thiam a hun.

Kha thil thleng khan vawiin ni thlengin nghawng lian tak a la nei chho mek. Nei zel sela, thil tha zawk hring chhuak ngei bawk rawh se. Hei tak hi Mizo mipui, police, zirlai leh politician-te hian thliar thiam ve tawh ang u. Khawvel hmun hrang hrangah leh kan thenawm lawk state dangah pawh tun hnaia kan issue ang hi a thleng fo tawh. Kan ramah ngei pawh tun hi a vawi khatna a ni lo. Mahse, keini ram anga hnam issue-a buaina chhuakah ram leilung fa leh an ram police-te heti taka kut inthlak vak vakna hi hriat tur a vâng. Police thuam famkim nena infam khan zirlai hmanraw keng lo, kut thawhtu zawk pawh ni lo kha kha ti khawpa zak kau zawk zawka an vaw duh mai khan ngaihtuahna a tithui ngawt mai. A thuhrimah, police duty hi mi sual (thil tisualtu) hum ai mahin mi sual laka mipuite venhim hi a ni. Tun ang thil phei kha chu kan ram leh hnam ralna leh dinchhuahna inkar tak tak a ni.

Ngun taka ngaihtuah hian kha mi ni khan police-ten Mizo zirlai min vua a ni ngawt lo. Mizo mipui (Mizo hnam) anmahni telin an vua a ni. Chu chauh a la ni nem, kar hmasa mai khan NGO Co-ordination Committee chuan kan zirlai pawisawi loten police kut an tuar vak kha tha an tih loh thu an sawi a. A hnu lawkah Police Association lamin, an la rawn chhanglet leh cheu. Kan hnam tan tiin thih pawh huamin kan bei theuh anga kan insawi lai mek hian Mizo leh Mizo kan la inbei chhunzawm zel a. Chakmaho ve thung chu an Kel e awl deuh der mai! I harh ang u.

Han let leh zawk i la. Zoreka khan Zoreha kha lo rek tak tak pawh ni se, a mi mal beih vak kha a kawng hmang chiah lo. Zirlai kha rek tak tak pawh nise, chu ai maha ngaimawhawm zawk chu, hmeichhia pawh thliar hauh lo leh dim chuang hauh lova police sek tha tak maiten indanna hmanrua pawh nei ve lo zirlaite-Chakma chhan nana zak kau zawk zawka an han hlap kha a serious zawk. Kha mi nia police tam tak chetphung atang khan chuan Zohlapa tia koh phu an tam khawp mai.

A thuhrimah, state dangah chuan hetiang hnam issue-a buaina a chhuah hian an police-te hian hmuh loh leh dan theih loh hi an bul lawka thil thlengah pawh an nei thin an ti. Hei tak hi hnam chianna chu a ni. Fiamthua an sawi thin, hmeichhe buanchaklo pakhat hi mi pakhatin a sual a, an han zawh chian chuan, “A lian em a, ka tan rei peih ka ring chuang lo va,” a ti e an tih ang deuh hi thleng thei a ni. Police-ho hian, “Kan theihtawp chhuahin zirlaite kh kan dang tang tang a, kan dang hneh ngang lo a ni,” ti thiam se la. Tin, sang deuh deuhah tiang kha lek pawh nise, a tlakna a san em avangin mihring a fuh khan na tawh lo mai se. Hliam tuar kan awm lo mai tur.

Pu KC.Lalvunga (L) nena kan inkawm tuma a thusawi ka thinlunga riak reng thin chu. Tum khat chu ram pakhata ambassador-a awmlai hian, ni khat chu opposition party-ho huaihawtin sawrkar thiltih duh loh lantirin kawng an zawha, an buai mup mup mai a. Ram khat ambassador ve ta chuan thil awmzia kan zawt chiang teh ang ka ti a, opposition hruaitute zinga mite chu an thiltih chhan tak ka zawh chuan kei India mi daih ka nih avang chuan ka bulah chuan an ram roeltute demna thu an chhakchhuak duh hauh loa, mak a tih thu min hrilh. Mi ram/hnam hi chu policy-ah te inbei ve bawk thin mah se, hnam issue-ah hian chuan opposition leh ruling an inthliar hrang ve meuh lo. Hei tak hi keini Mizo hnam tlemte hian entawn ve tawh a hun. Kan thenawm state-ah khuan Mizo ten kan tih hmasak ni miah loah pawh buaina kan tawk fo. Thihna rapthlak tak pawh kan tawk fo.Heng thilah hian kan Indian puite hian Mizo min tan vangin,an mahni hnam pui kut an thlak khat khawp ang. Kan ramah chuan khawlaiah pawh Vai leh mizo lo intibuai se,engkhaw sawi sethian mizo zawk chu kan thiam lo hmasa mai thin lo maw?!!

Zirlai hruaitute pawh inlet a hun: Tunhma atang tawh khan zirlai pawlte hian kan ram leh hnam tan thil ropui tak tak an lo ti tawh,an ti mek, an la ti zel ang. Mizo hnam tana an contribution hi a hlutzia chhut phak pawh a ni lo hial. Hetihlai hian, Zirlai Pawl zahawm leh thianghlim tak hi tute emaw avang hian a hmai a bal lek lek thin hi a pawi. Zep nak maw, Political platform short cut-na a nihna hi tuman Zirlai Pawl hlutna hi an ngaih hniam phah chuang lem lo. Mahse, hruaitu tha chuan hlauhawm,raltitna hmun leh hun harsalai berah pawh hma a hruai thin.A sa him chin atanga midang fuihpawrh thin hruaitu hi an awm ngai anih chuan, hruaitu tlak a ni ngai lo vang. Zirlai Pawl hian hma a lak dawnin a nihna leh zahawmna tihmelhem thei zawng a nih leh nih loh hi tun aia fim zawka in thlir thiam a tul. Agitation/ issue a len zawh poh leh a huaihawttute dinhmun a vawrh kangin a beng hniam dawrh thin. Tin, Zirlai hruaitu thenkhatte, zirlai hruaitu an nih laia ram leh hnam hmangaih tak thin, an han nih loh veleha, party pakhat tawtawrawt ring tak nih leh thin ringawt hi an chak huam tur a ni dawn em ni?

MBBS(Doctor)-te pawh inenlet rawh se: Hnam issue kan ti, a ni teh meuh mai. 1993 ah Kiran Bedi fanuin Mizoram quata atangin MBBS ah a lut tur kha kha ti khawp khan kan buai phah. Central jail-ah kan leng lo, de-addiction centre, Kolosib jail thlengin zirlai kan tang thup. A hnuah pawh MBBS chungchangah hian zirlaite leh mizo mipui hian buaina kan tawk zing tawh. Heng avanga, kan Mizoten sawrkar chawma MBBS zo tam tak an awm phah hi a hluin, a lawmawm. Mahse, MBBS an lo zirchhuaka, an mahni tana lu chhum ban chhum pawh huama lo beitu, mizo mipuite hi min enlet danah kan lungawi kim hauh lo. An rawn zir puitling ta chenga, sum ringawt menin an rawn meng thin hi chu-Doctor-ho hi inenfiah ve tawh se a tha. Sawrkara lutte pawh service dangin an neih ve loh NPA (chu pawh hlawhpui a bet) thlengin hamthatna an la dawng. Heng hi an thik awm lo. Mahse, private clinic an ngaih pawimawh aia nasa hian OPD in entirna hi dah pawimawh rawh se. Sawrkara thawk chunga Private Clinic hawn hi dan bawhchhiatna ni mah se, mipuiin kan mamawh, an demawm ngawt lo. Mahse, an tan thisen chhuah hial kan nihnate,an ni ang ema, engineer, civil service leh a dangte kan buaipui ve ngai loh hre lo niawm taka,rethei leh chhumchhia zawkte tawngkam dengkhawng tak taka in tawngkhum a awm thin niawma, thuthang hriat thin te hi a tak a nih chuan awm tawh lo se a duhawm ngawt mai.

Tunge Zorehtira chu?? Chakma chungchanga buaina lo intan dan hi history thui tak a awm hran lo. Tuna kan political Party liante hian Chakma Autonomous District Council (CADC) lo pianchhuah danah phei hian chuan mawh an phur lo vek. Chutihlaiin,u ang thei pakhat mah anawm lo thung. A tawi zawngin sawi ta i la, 1972 kuma Union Territory dinhmuna hlankai kan nih rual khan tuma hrin lohin CADC chu a lo piang ve nawlh mai a ni. He Isaka (UT) lo pian ruala Ismaela (CADC) lo piang nawlhah hian tunge a kaikuang sawi a hun tawh lo. A sawt bawk lo. Khatih hunlaia kan ram rorelna fawng vuantute khan an phak tawkin zoram thatna an thlir, an khawthlirna tarmit bun erawh power a tam lo khawp mai.

Thil chiang tak leh kan la siam that theih erawhchu hei hi a ni. Union Territory kan neih atang pawhin kumin hi a kum 45-na a ni tawh. CADC lo pian hnua sawrkarna fung vuantutte hian a tu a mah hian CADC thiah tumna leh kan ram atanga Chakmate hnawhbo tuma thapui thawh tumah an awm lo. Party pakhat hruaitu chuan ama thahnemngaihnain eng emaw zat Mizoram atanga thawnchhuah avang leh India Prime Minister hnenah hemi chungchanga a lehkha thawn avangin an sawi vung hle. Zepnak emaw, Pu Thenphunga Sailo hmalakna kha a huaisenthlaka, a fakawm. Mizo zingah ani anga chakma duh lohna hawi zawnga hmala nasa an awm lo. Mahse, ani meuh pawh khan thil tam tak a tizui lo tlat, a pawi ngawt mai. Kan ram hruaitute hian kan ram kan hnam leh kan sakhua a him nan hian tih tak zetin hma la teh se. An tlin rual ruala lo lam mipuite hi min zah sela, an chhungkhat lainate nena an eibang nawi ringawt mipui min hlui hi sim a hun. Kan party neihho hian Chakma MLA nei lo turin hma an la ngam vek tur a ni. Tun atanga hma kan la tan tawh lo cheu a nih chuan kan hnam hi kan boral har tawh dawn lo. Chanchinbu lamah Chakma Mizoram quata-a MBBS zir tawh mi 36 an ni tawh tih thu lo chhuakte hian he hnam hi bengharh mawlh teh se.A tak takah chuan, CADC neia, UT meuh an demand tawh lai hian kan ekcheh thut hi a thiang tawh lo. “Chumite chuan an chuti khati, chuti khati lo,” tia inpuhmawh tur kan ni tawh lo. Dik tak chuan, tu party mai pawh hian tlin an duh vek,a pawimawh bawk. Mahse, nang leh i party an tlina, zoramin a tawrh ai chuan tlin loh ngam a tha. Party mal aiin zoram hi i hmangaih hmasa phawt ang u.

Nakum maiah kan inthlang leh dawn ta. Zorarm tana hmachhawp tihpuitlin tak tak theih leh tum ngei nei chuang si lo va, a ngai aia a zawrh dan dang deuh leh tuaihnum deuh mai mai hmanga party campaign pawh hi zahthlak a ni tih hriat a hun. Anihna takah chuan, Chakma issue phei hi chu mizo mipui zawng zawng kan tanrual thapa, kan ram zimte humhim tura huaisen leh chhel taka ke kan pen tlan a ngai. Mahse, a kaikuang (Zorehtira) tak tak chu kan ram roreltute hi anni tho tho.Tin, kan party lian hruaitute pawh hian chakma district nuaibo hi theih loh anga an ngai a nih chuan thangthar, ram leh hnsm hmangaih, a ngaihna hria,hnam chhan nan chuan nunna hial pawh hlan huam kutah thuneihna hi hlan ngam rawhse.Chutiang mi chu thalai lehkhathiam zingah hian an tam viau ring ang u.Hetia kan sawi hian Chakmate hi- i hua ang u, ralthuam, tharum hmangin i umchhuak nghal rum rum ang u.. kan ti a ni lo. Democracy ramahchuan mipuite hi kan lal ber, thil kan tithei ber. Politics-ah chuan theih loh hi a theih (a kengkawhtu a zirin).

Mizoram zimte humhim tur hian dan hmangin dikna kan nei. Dan siamtute pawh a thlangtute mipui tho kan ni.India danpui siamthat hi a awlai lo ang bawkin, dan tha zawk siam hi Parliament leh Legislative Assembly hnapui ber a ni thung. Kan ramah Chakma District Council a piang thei anih chuan he dan bawk hi hlih theih loh a ni hauh lo, a kawng erawh kan lo zawhbel tawh a nih avang leh a kalkawng a thui tawh avang chuan a awlai hauh lo ang. Autonomous District Council hi hnam bil hminga a awm ngei chu a ngai. Mahse, hei pawh hi Mizo hnam hminga thlak theitu-angaihna hria anawm ka ring. Chakma hnam hminga dah ai chuan Mizo hnam peng (eng pawh) hmingin thlak ni se, chumi chhungah chuan Chakmate pawh lo cheng ve ang hmiang. Zorek

Politics rilru i paih tawh ang u
Kan lalte’n mumal taka min awpna kan duh lohna rilru atangin Mizoramah political party a lo piang a tih theih. Mizo lalte awpna hnuaiah kan hnam a zalenin a ralmuang. Saphovin min rawn awpa, kan lalte chu che thei lek lovin an siama, kan khawtlang inawpna fel an tichingpen, kan hnam rohlu aiin anmahni hnam min ngaihsantir, sap ngaihsannain kan rilru a luah khat.Chung min awpbettu-Sapho chu huat taka ruangin kan mizo lalte chu kan haw ta tlata, chu chuan Mizo Union Party a lo hring chhuak ta. Mizo leh Mizo kan incheksawlh ta nuaih nuaih a. Chu mai a la ni lo, mizorama party hmasa ber chhungkuaah pawh hmar lam leh chhim lam hruaitute an in nghirngho a, nihna leh chanvo an buaipuina lamah party hmasa ber pawh a phel phah hial.Tun thleng hian chu rilru chu party tin hian an chhawm chho zel.

“Thih leh ruam khatah, dam leh tlang khatah tihte, sem sem dam dam, eibil thi thi,” tih thupui mawi tak kan lo neih daih tawh chu-party worker leh chhungteism(chhungkhat laina in duhsakna hleihluak)-in min thlaksak. Han belhchian chuan Policy/propaganda that hmel pui pui kan auchhuahpui tam tak hi ram mipuite-a nawlpui thatna tur lam aiin, sawrkarna siam theihna atana tangkai, chumi hnua inhaivurna policy-a ang zawk mah thin em? He induhsakna policy tenawm hian party chauh a huap ta lo-kohhran, tlawmngai Pawl hrang hrangah he hri tenawkm hi kan khawi pung mek zel! A hria, a thiam, taima etc.. aiin, party mi, thisen zawmpui..kann in duhsak. Chuchuan tun dinhmun min hruai thleng. Siamthat theih erawh a la ni e.

Hman ni chu facebook- ah hian thlalak hlui tawh tak- kawng chhe tak maia motor an nawr kallai hi a lo intara. Chutah, a rawn post-tu chuan, “Tute emaw sawrkarlai pawhin kawng a tha bik lo e….” tih lam hian a rawn sawi zui a. Comment hrang hrang ngaihnawm tak tak a hring chhuak nual. Hei hi kan politics kaplui dan a la nih miau chuan changkan lam chu a la hla hle.

Hmeichhe rilru an sawi thin nen hian ka tehkhin. Nuin Mo an neih chiah hian, a mo chungah nu berin that chhuah a, “Khawnge, ka mo lai khan ka retheih thin em kha maw, ani hi chu duat takin kan enkawl teh ang” ti ta lo va, “Mo ka nih lai pawhin ka retheih em kha, ani pawh hi ka duat hauh lo ang,” tih rilru an pu zel nia an sawi thin hi! “An sawrkar lai pawhin an chuti khati lo,” ti lo vin, “Khawnge, kan hmaa mite khan chutiang chuan an ti lo va, keini chuan ram tan in thawk tak tak teh ang” tih rilru pu chunga hnathawktu ram hruaitu kan neih tam zawh poh leh hma kan sawn nasa dawn. Hman ni chu facebook- ah hian thlalak hlui tawh tak- kawng chhe tak maia motor an nawr kal lai hi a lo intar a. Chutah, a rawn post-tu chuan, “Tute emaw sawrkarlai pawhin kawng a tha bik lo e….” tih lam hian a rawn sawi zuia. Comment hrang hrang ngaihnawm tak tak a hring chhuak nual. Hei hi kan politics kaplui dan a la nih miau chuan changkan lam chu a la hla hle. Hmeichhe rilru an sawi thin nen hian ka tehkhin. Nuin Mo an neih chiah hian, a mo chungah nu berin that chhuaha, “Khawnge, ka mo lai khan ka retheih thin em kha maw, ani hi chu duat takin kan enkawl teh ang” ti ta lo va, “ Mo ka nih lai pawhin ka retheih em kha, ani pawh hi ka duat hauh lo ang” tih rilru an pu zel nia an sawi thin hi! “An sawrkar lai pawhin an chuti khati lo,” ti lo vin, “Khawnge, kan hmaa mite khan chutiang chuan an ti lo va, keini chuan ram tan in thawk tak tak teh ang” tih rilru pu chunga hnathawktu ram hruaitu kan neih tam zawh poh leh hma kan sawn nasa dawn.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?