ZPM-in MLA bial 34 chuh tum

Aizawl: Pawl hrang hrang thawkho in an din Zoram Peoples Movement chuan Mizoram MLA inthlanpui loawm turah bial 34 chuh an tum a. Election symbol tur chu ECI-ah dil an tum.

Zalen palaiin ZPM Steering Committee Chairman Upa Lalliansawta hnen atanga thu a dawn danin MLA candidate hi an tifel thawkhat tawh tih a sawi a, an candidate tur chu MLA inthlan puan a nih hunah an puang ve dawn niin a sawi.

ZPM Chairman chuan Mizoram chhimlam Lawngtlai leh Siaha district ah chuan candidate hi neih an tum lo niin a sawi.

Symbol chung-changa Zalen zawhna chhangin, “Free symbol zinga pakhat chu kan election symbol atan hian kan ruahman a. Thawhtanni (8.10.2018) hian kan dilna hi Election Commission of India-ah thehluh kan tum a ni,” a ti.

Zalen palaiin an MLA-te independent MLA an nih dawn avangin an thunun thei dawn em ni tih a zawhna chhangin ZPM Chairman chuan, “Control theih kan inbeisei,” a ti a. Hemi chungchangah hian dan lam thiamte pawh an rawn niin a sawi.

PRISM nena thawhho chungchangah Lalliansawta chuan hmasawnna a awm lo tih sawiin, “Kan inbiak hun hi a tlai deuh hlek a, thil kan lo kalpui thui tawh si a ni,” a ti bawk.

ZPM-in bial 34 chuh an tum zingah hian Chief Ministerial candidate Lalduhoma chu bial 2- Serchhip leh Aizawl West I bialah te a ding dawn a ni.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?