ZU leh MIZORAM

Mizoramah sawrkar phalna in zu zawrh a ni a, hei hian sawisel a hlawh rualin faktu pawh an tam hle mai a, vawiin thlengin inhnialna thlentu a la ni ta reng a ni. Chief Minister sawi ang deuhin Mizote tluka zu buaipui hi hnam dang an awm ve ang em aw tih theih hial a ni a, zu in ten an buaipui tluk zetin in lo te pawhin an buaipui bawk.

Mizoram sawrkar chuan kum 1995 atangin zu khap burna dan ‘The Mizoram Liqour Total Prohibition Act 1995’ a hmang tan a, thang khat lian zet a hman hnuah ram tana tha zawk tura ngaiin sawrkar chuan zu phalraina dan hi hmangin awlsam zawkin zu pawh lei theih a ni ta a ni. Hetia phalrai an nih tak chiah hian zu in thin pawh an pung ta hluai mai a, chhiatpui pawh an tamin nunna chan pawh an tam hle a. Hei hian Mizo zia a pholang chiang hle a, thil ti hluai thin kan nihna leh thil thar lawm kan nihna a lantir chiang hle awm e.

Zu hi thil tha a ni lova, ruih phei chu a tha lo lehzual a ni. Chuvangin, in loh hi a himin a tha ber a; mahse, a tha ber hi kan phak/tlin miau loh avangin sawrkar pawh hian dan hmangin a zuar (khuahkhirh) ta mai niin a lang. Zu chungchangah hian inhnialna a tawp thei dawn lova, kan zuar emaw zuar lo emaw a lehlam zawng zawng hian sawi tur tam tak a awm thei awm e. Khawvel ram changkang zawkte ngaihtuahin zu khap hian sawtna a nei lo nia hriain an phalrai tlangpui a, hetih lai hian Mosolman leh Dictator rorelna hmun thenkhatah chuan khap a ni thung.

Zu khap hlawhtlinna chungchangah pawh ngaihdan a inanglo hle mai a, Mizoramah kum 20 zu khap chhung khan zu a vang chungin a duh tan chuan  lei tur a awm reng a. State pawnah kan sum tam tak a luangral huau huau a, a duh chuan man to zawkin an lei thei reng a ni. Zu khap hlawhtlinglo titu tan chuan a hlawhtlinglo a tih theih ang a, zu a vang leh hmuh mai mai tur a awmlo te kha a hlawhtlinna a ni ti tan chuan a hlawhtling a tih theih ang.

Mizoramah zu phalrai anih hlim khan kan hmang thiam lovin chin tawk awm lova in kan tam a, mahse a kum telin kan hmang thiam sawt sawt niin a lang a. Tuna kan dan hman mek pawh hi a chhiat a that sawi nan chuan a la hma deuh niin a lang. Zu hi thiltha a nihloh avangin in loh a tha ber a, mahse a tha ber hi kan tlinlo anih chuan in thiam tura kan inzirtir a pawimawh hle.
Engpawhnise sawrkarin zu chungchang zirchiangtu tur MLPC study group a din a, an ni hian uluk takin an zirchiang a, naktuk maiah an report hi an thehlut tawh dawn a. MLPC Study group report hi a rintlak turah ngai ila, sawrkar pawhin uluk taka zirin kan ram tana tha ber turin huaisen takin kalpui se a duhawm hle.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?