ZU NGHEI CHIRI

MJA Preseident-in, “Thianzaho titi khawmin tunlai zu in mi nghei thut buai leh chiri tamzia an sawi a, I titi thupuiah an beisei e,” a rawn ti miau si a!

Tunlai zu hi a tha lo bik a, zu ngheite hian an tuarna bik niawm anga titite ka hre thawi a. Chu lam ni loin zu in nasa an tam tihna mai a ni zawk ang. Hmanlai leh tunlai zu pawh hi miin an in nasat chuan an nghei thut nghawng hi a buaithlak vel vek zawk.
Zu nghei thut nghawng manganthlaktak pakhat chu ‘chiri’ hi a ni. Zu nghei chiri hi saptawng chuan withdrawl seizure an ti a. Zu nghei thut avanga kaih a ni mai. Zu nghei phungzawl a nih mai chu! (Perhpawng chiri nena tehkhinin ‘chiri’ hi kan ti ta ni maw?) Ruihhlo dang, alprazolam, nitrazepam, diazepam lam chi ngawlveihoin an nghei thutin an chiri duh hle bawk.

Zu nghei chiri hi zu in hnuhnun ber atanga darkar 12-24 chhungin a lang tlangpui. A aia hmate, a hnu deuhte pawh a ni thei bawk. Inrinlawk hman hmain zu nghei hlim awm mai mai laite chu nikhawhreloin an au thawt a, an taksa a mar awt a, an inhum khawng tlat a. Chumi hnu lawkah chuan an khur khawng ta awrh awrh thin. An lei leh biang chhung lamte an she tel fo a, thi a chhuak zawih zawih thei.

Chutia an khur mar awrh awrh chu an lo zawi leh ta hnawk a. An thaw ri bawrh bawrh a, an rawn harh tan a. An rawn harh tir chuan a zui ruai thin. A then chu an muhil nghal bawrh bawrh thin bawk. Harsatna dang a thlen loh chuan chute zawng chu a ni. Chiri is over!

Chiri avanga thil pawi dang thleng thei erawh a awm. An tluk thut avanga insawh na, luruh khi, thluaka thi tlingte pawh an awm fo. Lei seh bung dawn khawpa inseh an awm thin bawk. Chiri nawn awn awn theih a ni. Chiri zo hlim â hi a buaithlak thei bawk. Vengtu neih loh chuan tei bo tak mai te, tluk hlum mai te pawh a hlauhawm thin.

Chiri hmuh hian phili ruai a awl khawp. A rapthlak deuh roh bawk a! Tih tur tehchiam a awm lo. An kaa thil awmte a lo luan chhuah theih nana a saisir deuh zawnga an lu dah theih chuan a tha. A kut khawng leh insang mar tal awrh awrh hi lo vawn beh tur a ni lo. An taksa hrulah an ban an mar awt awt mai a nih avangin khawihah mah an va invai na pha lo. An taksa inpawt mar mil loh zawnga lo pawh beh ve phet kan tum avangin ruh chuaktuah a pelhsawlh thei zawk.

Chiri pangngai ringawt hi chu thihnaa ni lo. An tlu tur lo dawm hi an insawhna tur ven nan a tangkai. An lei she tur ven hi thil khirh tak a ni. An chiri tan tir ka an ân laia eng emaw kan lo rawlh hman a nih chuan a ven theih. Lei she tur ven nan hian thirfian leh thir lam leh thilsak chi chu sehtir hauh loh tur a ni. Biang tihrawl hi tihrawl chak ber a nih avangin kha chih insehruh hi na tak a ni. Thir lam chi kan rawlh vaih chuan ha a balin a khem thei. Puan tumtel leh thil nem lam deuh hman a tha. Silipar an sehtir fo thin hi remchang hnaivai tha tak a ni. Bal viau mah se lei seh bun ai chuan a pawi lo zawk. Kut lo va rawlh ta maite pawh an awm thin! Atthlak!

An lei she tur ven tum ta lutuk a, an kha-chih nghet tlat tawh kar kau tum an awm thin. Tih hauh loh tur a ni. Ha an kar bal fo. Hliam dang pawh a thlen thei. An kha an chih hman tawh chuan thil pawi tur zawng a thleng hman tawh tho. Kar kau hauh tawh suh.

Mawza uih hnimtir hian thatna a nei lo. Chiri chhung hi minute khat lek a ni. Hmanhmawh baklenga pheikhawk han phelh a, mawza han phelh leh a, an hnar bulah an dah vel chhung khan an chiri hi a lo zo hman ve hrim hrim a ni zawk! A uih em avanga inhnim harh pawh an ni lo! Uih thlawn a ni e.

Chiri tur hriat lawk hi a har hle a, lo inrinlawk theih pawh a ni lem lo. Lirnghing tur sawi lawk theih loh ang a ni. Zu in nasa, in rei tawh taksa chak lo zual apiangah ‘risk’ a sang mai. Chiri ngai lo a awm tak tak theih lo. In zat, in rei zawng, chaw ei leh mut that danah a innghat.

Zu nghei dawna daktawr rawn a, inenkawlna tha dawn hi invenna tha ber a ni. Zu mana pawisa ui si lo, inenkawl nana uikawm leh tlat si an awm thin. Zu nghei dawnah daktawr rawn ngei ang che, i chiri kha a hmuhnawm loh thei si!

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?