Zuk leh hmuam do kawngah hmasawnna

Zuk leh hmuam do kawngah hmasawnna Global Adult Tobacco Aurvey (GATS) thar berin a tarlan dan chuan  Mizoram chuan kum 6 chhungin zuk leh hmuam ah hniam lam a pan a, 67.2 atangin 58.7 ah a tlahniam  a, a tlakhniamna hi 8.5% lai niin a hluar berna hmun India ramah  kan ni tawh lova, Tripura chu 64% niin 1-na a ni mek a ni.
Hetianga hmasawnna nasa tak kan hmu a hi a lawmawm hle mai a, a thawktute thawhrimna a ni a, fak pawh an phu hle a ni.

GATS tehfungah hian Mizoram chuan kawng tin deuh thawin hma a sawnna, socio-economic lam thlir pawhin meiziala mi pakhat zelin sum a hmanna pawh a tlahniam a, zozial zukah erawh sum hmanna tlemin a pung deuh a, hei pawh hi thil man pung zel vangin ‘brand’ thlak an awm nia ngaih a ni a. Chutih rualin a chiktu mit atang chuan hei pawh hi pawh thlak chakawm tak leh chona atana lak chakawm tak chu a ni khawp ang. Zuk leh hmuam ti zingah hian zial zuk hi 39.7% atangin 34.4% ah a tlahniam a, a hmuam lam ti chi pawh 40.7% atangin 33.5%-ah a tla thla bawk a. Zial aiin hmuam lam ti chi-ah hian sim emaw a ching thar an tlem zawk niin a lang thei a. Zuk leh hmuam sim hi thil har tak a nih avangin tuna a ching dawklak tawh te tan sim hlen a har a rinawma, a ti thar turte ven hi hnapui bera neih a tha rihin a rinawm a ni.

Sikkim an entawn tlak hle a, 40% laiin zuk leh hmuam hluar lamah hian hma an sawn a, national average 28% aia hniam ah awmin 15% vel chauh a ni a. Hetiang anga hma an sawn theih dan hi a mak ang reng zawk a, eng pawh nise Mizoram tan entawntlak tak an ni a. Engtin nge hetiang hian hma an sawn theih? Kan ramah a tangkai theih dan a awm em? tih hi hriat chian tum bawk ila a tha awm e.

Inchhunga zial inzuk khum 95% chu 84%-ah tlahniam rih mah se helai hi nasa taka tan lakna tur niin a lang a, heti zatin mahni inchhunga zial zuk kan la phal chhan hi bihchian a ngai niin a lang. Second hand smoke hlauhawmna kan hre hlawm tawh viau a, inchhung khura meizial zuk phal lohna chhungkua tam tak neih phahna tham a  tling tawh awm e. Inchhunga meizial zukah hian kan la sang ang reng hle a, khap nachang kan la hre tawk lo nge indil luih kan la ching viau tihte pawh zir tham a awm a ni.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?